Ourense | Termatalia 2026 pechou esta tarde as portas da súa 24ª edición convertida no foro de debate no que 50 expertos de 10 países analizaron as novas tendencias do turismo de benestar e como os balnearios tradicionais han de adaptarse a elas sen perder a súa tradición, a súa identidade nin a súa dimensión sanitaria. Os relatorios do VII Congreso Internacional sobre Auga puxeron de manifesto ademais o bo momento que vive o termalismo e o poder deste como motor de desenvolvemento da contorna no que o seu sitúan os balnearios (medio rural na gran maioría dos casos)
Este congreso foi seguido de forma física por 500 persoas durante as dúas xornadas aos que hai que sumar os asistentes virtuais que se conectaron desde España, Portugal, Francia, Estados Unidos, México, Colombia, Perú, Brasil, Uruguai e Chile. En total, a Feira Internacional de Turismo Termal, Saúde e Benestar atraeu a Expourense a 3.000 visitas durante os dous días.
Entre as actividades celebradas nesta segunda xornada destacaron ademais o Taller de Ioga Wellness impartido por Experiencia Wellness ou a cata de augas termais organizada por Turismo Centro de Portugal. Tamén se presentaron varias publicacións relacionadas con estética.
A Wellness & Medical Tourism World Association entregou dúas distincións a expositores que destacan pola calidade dos servizos relacionados co turismo de benestar e turismo médico. As empresas recoñecidas foron Termas de Sao Pedro do Sul (Portugal) e o Grupo Caldaria (España).
Termatalia 2026 celebrouse co apoio principal da Xunta de Galicia a través da Axencia de Turismo de Galicia e da Deputación de Ourense Ademais, contou como colaboradores como o Campus Auga da Universidade de Vigo, a Cátedra de Hidroloxía Médica-Balnearios de Galicia da Universidade de Santiago de Compostela, o ICTES, o Concello de Archena, Galicia Calidade e RENFE como Transporte Oficial.