Viana do Bolo | O director de Turismo de Galicia, Xosé Merelles, asistiu á inauguración do monumento e da placa conmemorativa que recoñecen Cepedelo, unha aldea de Viana do Bolo, como o pobo habitado máis alto de Galicia. A vila sitúase a 1.350 metros sobre o nivel do mar e constitúe un bo expoñente do turismo de interior, cun patrimonio histórico e etnográfico significativo.
A acreditación ven da man da Área de Rexistro Central de Cartografía, así como do Instituto Nacional de Estatística (INE). O monumento foi promovido pola Asociación de Veciños de Cepedelo e consiste nun bloque rectangular de granito de 2 por 1,30 metros, cuberto cunha estrutura de lousa a modo de tellado, no que se atopa incrustada a placa conmemorativa.
Ademais, o acto de inauguración da placa e do monumento coinciden coa 3ª edición da Festa do Caldo de Cepedelo, parte das celebracións patronais da Asunción, que teñen lugar dende o 13 ata o 16 de agosto. O director de Turismo de Galicia destacou que a festividade “constitúe un exemplo de iniciativa veciñal orientada á dinamización do medio rural mediante a gastronomía, o patrimonio e o turismo”, poñendo en valor a implicación da poboación local.
Xosé Merelles tamén explicou que tanto a aldea como a festa “representan á perfección os valores de singularidade e autenticidade do destino promovidas por Turismo de Galicia na súa Estratexia de Turismo 2030”. Neste sentido, Cepedelo convértese nun “exemplo do modelo turístico polo que estamos a apostar, con capacidade para consolidarse como referente dun turismo de interior que promove oportunidades no rural galego”, engadiu.
Potencial do turismo de interior en Ourense
Esta aposta por Cepedelo reflicte a iniciativa de seguir diversificando a oferta turística galega e reforzando o atractivo dos destinos de interior. Os datos turísticos do primeiro semestre do ano amosan unha evolución positiva desta actividade na provincia de Ourense con 163.602 viaxeiros, un 6,9% máis que no mesmo período de 2026.
Neste contexto, a aposta por estes destinos permite avanzar cara a unha oferta turística máis diversificada e menos concentrada nos grandes núcleos e destinos tradicionais, o que favorece a chegada de visitantes ao interior de Galicia. O turismo internacional tamén evidencia novas oportunidades para o destino galego, ao achegar máis de 30.000 viaxeiros estranxeiros á provincia no que levamos de ano, cun incremento de case o 20%.