Ourense | Máis de 250 ciclistas disputarán unha nova edición da “Ourense Strade Termal”, unha das marchas cicloturistas máis singulares do calendario nacional organizada pola Deputación de Ourense a través do Instituto Ourensán de Desenvolvemento Económico (Inorde). A proba levará aos cicloturistas apaixonados do “sterrato” a descubrir fermosas paraxes da Baixa Limia, á vez que conserva o seu carácter internacional, xa que chegará á Cámara Municipal de Montalegre.
O evento deportivo foi presentado hoxe no Castelo de Montalegre polo presidente do Inorde, Rosendo Fernández; o xefe provincial de Turismo en Ourense, Cecilio Santalices; o alcalde de Muíños e o concelleiro de Lobios, Plácido Álvarez e Perfecto Paz, respectivamente; o director técnico da proba, Serafín Martínez; o capitán xefe do Subsector de Tráfico da Garda Civil en Ourense, Javier Barja; e representantes da Cámara Municipal de Montalegre.
O evento deportivo disputarase o vindeiro 26 de abril, con saída e meta en Lobios, ofrecendo aos participantes dous posibles percorridos de 115 e 80 qms. con tramos de “sterrato” en ambos casos, que son camiños de terra compactada que achegar un carácter diferencial a esta proba e que sumarán en total 12 qms.en total.
Trátase dun dos eventos contemplados no convenio asinado entre o Inorde e a Axencia de Turismo de Galicia para a organización de probas que contribúan na promoción turística da provincia. O evento volverá a percorrer os concellos de Lobios e Muíños, nun trazado que mestura estradas de España e Portugal e atravesa un entorno natural de gran valor paisaxístico, marcado pola identidade termal da zona. A novidade deste ano será que volverá a pasar polo Géres portugúes atravesando as localidades de Tourém e Pitoes das Junias, de Montalegre.
A saída e a meta estarán ubicadas nas instalacións do Hotel Balneario Caldaria de Lobios, punto neurálxico da proba e reflexo da esencia termal que define este evento. A “Ourense Strade Termal” forma parte do Calendario Nacional da Real Federación Española de Ciclismo, reforzando o seu posicionamento como unha experiencia que mestura deporte, territorio e turismo.