• Segue conectado
  • |

"Hai que falar con calquera que se sinta nacionalista"

Rafael Cuíña, candidato de CxG por Pontevedra , felicita a AGE polos resultados e asegura que o BNG “é imprescindible” en Galicia
Xurxo Salgado/Lalín | Apañou máis de 800 votos en Lalín —a súa localidade natal— e converteu a CxG na terceira forza máis votada desa localidade. Por iso, non descarta volver a este municipio como candidato nas vindeiras municipais. Recoñece que os resultados de Compromiso non foron bos pero agarda que o 21-O sirva para consolidar un proxecto de futuro.
Di que deixou amigos no PPdeG pero que se sinte moi “cómodo” na súa formación nacionalista. Unha forza, di, que é de “centro-esquerda”. As tarefas máis urxentes; “congreso constituinte, reforzar a estrutura comarcal e moito traballo”.
Xa pasaron uns días dos comicios. Agora, en frío, como valoras os resultados?
Pois non foron bos. Agardaba máis, certamente. Demasiados atrancos no camiño en tan pouco tempo. E asumo a miña cuota de responsabilidade. Puxen o meu cargo a disposición da executiva e por unanimidade pedíronme que seguise con máis forza se cabe. Só podo dar as grazas aos meus compañeiros pola xenerosidade.

Cres que CxG pode chegar a máis deses 16.000 galegos que apostaron por ela?
É evidente que o creo

E como?
Temos que facer xa ese congreso constituinte e que a marca política sexa coñecida. Daba a sensación de que a algúns non lle interesaba que fose coñecida. Eles saberán porque.

Que cousas habería que mellorar a partir de agora?
Reforzar as estruturas comarcais, definir ante a sociedade o que é CxG, e moita humildade para asumir os nosos erros.
“Centro-esquerda”
Unha crítica que se vos fai é que non se sabe se CxG é unha formación de dereitas, de esquerdas ou de centro?
Ou non se quere saber… nesta formación hai galeguistas progresistas até xente da esquerda renovadora. Está claramente situada no centro-esquerda Galeguista-nacionalista.

Foron as túas primeiras eleccións como candidato ao Parlamento. Cales son as túas impresións?
A experiencia foi boa. Fixen case 6.000 km, reuninme con todo tipo de colectivos, falei cunha cantidade inxente de persoas. En resumo, a día de hoxe coñezo moito mellor a problemática da miña provincia.

E se tiveras que elexir algún momento destes 15 días de campaña, con cal te quedarías?
O mitin de Lalín co auditorio cheo, e a impresión que me causou a cantidade de xente que está descontenta cos políticos. (Con toda a razón)

Acadaches máis de 800 votos en Lalín. Xa pensas nas municipais?
Pensamos como organización, si, serán as nosas eleccións, como xa tiñamos previsto. Estou moi orgulloso da resposta dun pobo como o lalinense no que tan difícil é non votar ao PP, que baixou 900 votos. CxG será moi importante alí tamén.
“Atado ao mástil”
E cres que CxG chegará como partido a esa cita electoral?
Non teño a menor dúbida. O certo é que xa o propio domingo escoitei cantos de serea. Estou atado ao mástil…

Os principais medios falan da ausencia dun líder carismático, estás dacordo?
Creo que Xoán Bascuas é un traballador incansable, con unha idea clara do que quere para esta terra, e unha excelente persoa. Creo máis en eso que en lumes de artificio.

Felicitacións
E a que cres que se debe o éxito de AGE?
Pois a que moitas persoas pensaron que a súa mensaxe recollía a indignación social contra un goberno evidentemente negativo para esta terra. Eu alégrome por eles, sobre todo por Martiño e Beiras que o merecen. É coñecido que a min non me gustaba un pacto cun partido non nacionalista como IU. Os felicito sinceiramente.

Pensas que esta formación apañou votos do voso electorado?
Penso que é evidente
Acordo nacionalista
Tamén hai quen fala de volver a reeditar un pacto nacionalista. Cres que logo da escisión no BNG se pode chegar a un novo acordo entre formacións nacionalistas?
Pois o que hai que ofertar son produtos en función dunha demanda. O BNG é necesario para Galiza, sempre o foi. Hai que falar con calquera que se sinta nacionalista, e queira que os centros de decisión estean en esta terra.

Foches militante do PP durante moitos anos. Como te ves como candidato noutra formación?
Pois sinto que agora, nunha formación nacionalista, estou na miña casa, ideoloxicamente falando.

E a xente non te pregunta porque deixaches o PP? e que lle dis logo de que esa formación volvera a arrasar nas eleccións?
Non perdo moito o tempo con este tipo de cuestións. Eu marchei de alí porque non teño nada que ver con eles. No persoal teño moi boas amistades alí.

Pero hai quen se puxo contento no PP de Pontevedra polos seus resultados? Parece que algúns non lle querían ben nesta formación…
Supoño que a vida é así. Eu miro cara adiante, nin para atrás nin para o lado. O PP ten o meu respecto, mais non é o meu proxecto. Eu son galeguista. Por certo, parabéns polo seu resultado.

E, agora, cales son os retos inmediatos?
Congreso constituinte, reforzar a estrutura comarcal e moito traballo, moito…

Publicado o 25 Out 2012 en Entrevistas.
AVISO: Esta entrada ten máis de seis meses dende a súa publicación. É posible que o contido esté desactualizado.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies