Gómez Reino: “É intolerable que Feijóo se negue a aplicar a Lei Celáa”

O voceiro de Galicia en Común celebrou unha lei que "nos achega a niveis europeos"

Santiago de Compostela/Galicia en común | “É intolerable que o presidente da Xunta, Alberto Núñez Feijóo, diga que non aplicará unha lei orgánica como a Lei Celáa aprobada con ampla maioría no Congreso dos Deputados”. Con esta contundencia respostaba o deputado de Unidas Podemos e portavoz de Galicia en Común, Antón Gómez Reino, as declaracións públicas do mandatario galego nas que anunciaba a súa insumisión a unha lei aprobada a semana pasada co respaldo maioritario de sete formacións políticas da Cámara ao afirmar que “aplicaría o mínimo” a Lei Celáa.

“Desde Unidas Podemos-En Comú Podem-Galicia en Común entendemos que é unha magnífica nova a aprobación dunha novo texto normativo que nos achega os niveis europeos, onde o 80% do alumnando asiste a centros públicos, e que da carpetazo a Lei Wert, un modelo ancorado no século pasado”, manifestou Gómez Reino, en rolda de prensa desde o Congreso antes do inicio da Comisión orzamentaria. “Agardamos que o manifestado por Feijóo sexa unha declaración provocadora porque non se entende que un presidente autonómico se negue a aplicar unha lei orgánica aprobada con ampla maioría por esta Cámara”, reiterou.

“Fomentamos a protección das outras linguas cooficiais dun Estado diverso, rico e plural tamén nos idiomas”

“É triste a estratexia ruidosa e populista que está a adoptar a dereita extrema e a extrema dereita en manifestacións baseadas en bulos nas que se pasean en autos de gran cilindrada”, lamentou o deputado galego. “O castelán, como é obvio nunha lingua con 550 millóns de falantes en todo o mundo, non está en perigo. Fomentamos a protección das outras linguas cooficiais dun Estado diverso, rico e plural tamén nos idiomas”, sinalou.

O deputado coruñés tamén se refería hoxe a última ocorrencia da familia Franco de apelar a vulneración da súa intimidade para tratar de dilatar a entrega do Pazo de Meirás en Sada (A Coruña) que unha xuíza ten fixada para o vindeiro 10 de decembro. “Os Franco teñen que entender dunha vez que a súa impunidade rematou e que toca pór fin ao espolio en Meirás pero tamén na Casa Cornide; traballamos para que pronto siga o camiño do Pazo e retorne ao pobo galego como o resto dos bens dos que se apropiaron”.

Doutra banda, Gómez Reino tamén se refería hoxe a unha iniciativa aprobada onte na Comisión de Asuntos Exteriores da que é vicepresidente para avanzar no esclarecemento do que semella foi a execución en Filipinas do coruñés Diego Bello. “Tal e como fixemos xa hai un mes nesta mesma sala, cando presentamos a iniciativa, queremos amosar o noso agarimo e solidariedade a familia de Diego Bello, e reiterar que desde o noso grupo traballamos para que o Congreso aprobe unha declaración institucional a prol da xustiza e da reparación da memoria deste cidadán español, deste rapaz galego e veciño da Coruña”.

O portavoz de Galicia en Común denunciou a “persecución política” por parte do PPdeG que está a sufrir o xinecólogo Javier Castrillo, profesional da Sanidade Pública galega en Verín que tivo e ten un papel fundamental para revertir o peche do paritorio nun movemento cívico exemplar. “Pasamos do Verín non se pecha á persecución política a este facultativo”.

Por último, á luz das últimas informacións sobre a suposta ocultación de millóns en contas suizas, o deputado de Unidas Podemos reiterou novamente a petición de que se investiguen “as contas escuras” do rei emérito.

“Xa é hora de que regrese e dea contas á Xustiza. Desde UP traballamos para poder monitorizar as contas pasadas e presentes da Casa Real. Xa que temos unha Xefatura do Estado que aínda non puido ser votada polos cidadáns esiximos que poida ser controlada por esta Cámara”, concluíu.

Outros artigos

Os nosos anunciantes son importantes para nós.
Fainos o favor de desactivar o bloqueador de anuncios ou
engadir este sítio a túa lista branca.

Grazas!