• Segue conectado
  • |

Festival Solidario Manos Unidas na Guarda

A Guarda | O Centro Cultural da Guarda completou o seu aforo na celebración do Festival solidario Manos Unidas. Evento, presentado por Emilia Otero, que tiña como obxectivo principal loitar contra as desigualdades e buscar a colaboración dos veciños, veciñas e autoridades presentes na loita contra a fame.

A actuación que abriu o festival a prol da acción de Manos Unidas contra a fame foi a do acordeonista Daniel Vilanova, que interpretou dous temas moi aplaudidos polos presentes e que foron o inicio perfecto para esta xornada de música e solidariedade.

 

A continuación viu un dos pratos fortes da tarde: a presentación do libro “La Voz del Silencio” de Oliva María Pereira González. A primeira en intervir foi Begoña Cebrián Acuña, presidenta da delegación de Manos Unidas na provincia, que expresou o seu agradecemento aos asistentes e colaboradores do evento e fixo unha pequena presentación, chea de emoción, dos proxectos que está a desenvolver a ONG como, por exemplo, o que están a levar a cabo en zonas vulnerables de El Salvador.

 

En segundo lugar interviu a xornalista e poeta Aurea Sánchez, encargada de introducir a vida e obra da autora de “La Voz del Silencio”. Así fixo unha pequena achega sobre a súa relación persoal e profesional, repasou as obras anteriores de Oliva María e falou un pouco da súa biografía, destacando que a solidariedade e a capacidade da autora para dar voz aos que non a teñen son as súas principais características. Para rematar, a propia Oliva María falou da súa obra e da motivación para realizala, que en esencia é a de axudar aos desfavorecidas. Ademais afirmou que no libro conta os seus soños, luces e sombras e que os lectores se verán reflexados neles.

 

Tras a presentación do libro continuaron as actuacións, como a do Trío Luetto que achegou unha gran interpretación dos temas “Aleluya” e “Tu gitana”. Logo chegou o baile co Grupo Baile Moderno Xamaraina, que bailou dous temas de dous estilos moi diferentes, demostrando que na Guarda hai moita canteira para a danza.

A continuación dúas nenas leron ante os presentes dous dos poemas recollidos en “La Voz del Silencio”, a publicación anteriormente presentada, no que foi un momento moi especial para autora.

 

Tras esta emotiva lectura volveu o ritmo cos Grupos de baile do Ximnasio Do Majó. Primeiro o grupo infantil e despois o xuvenil trouxeron moito ritmo e alegría á xornada. Un ritmo e alegría que non fixo máis que aumentar coa actuación das Pandereteiras Coiro Vello, que ofreceron ao público as pezas “Vals de amor” e “Desfeita galega”.
Dende Vigo viu a seguinte actuación, co Grupo de Baile Bambalina, na que tanto o grupo infantil como o xuvenil arrancaron os aplausos entusiasmados do público.

 

Xa para dar por concluída esta velada, na que todos os participantes buscaban colaborar no posible a erradicar a fame nos lugares máis desfavorecidos, realizouse a entrega dos agasallos en agradecemento aos participantes, sorteáronse os premios das rifas vendidas na entrada do evento para colaborar con Manos Unidos e pechouse a velada coa poderosa actuación da Coral do Rosal.

Publicado o 16 Feb 2017 en A Guarda, Portada.
AVISO: Esta entrada ten máis de seis meses dende a súa publicación. É posible que o contido esté desactualizado.
Síguenos na nosa canle en TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies