Baiona | Ante a investigación que a Fiscalía leva a cabo tras abrir expediente contra o concelleiro de Urbanismo José Ángel Baamonde Rodríguez por presunta incompatibilidade no cargo municipal ao ser accionista da empresa Encaixa Modular SL, o Alcalde de Baiona Jesús Vázquez Almuíña decidiu reordenar o seu goberno municipal asumindo directamente as competencias de Urbanismo, Patrimonio e Vivenda.
Baamonde foi así substituído de Urbanismo pasando agora a asumir as carteiras de Medio Ambiente e Infraestruturas. Insistindo na súa presunción de inocencia, Almuíña xustificou esta decisión coa finalidade de “evitar presión”.
Este reordenamento do goberno municipal non pasou por alto para a oposición baionesa. O PSOE denunciou que Almuíña “ocultou información” e “cambiou o relato” ao recoñecer públicamente que sabía deste caso desde o pasado 20 de marzo. Pola súa banda, o BNG reafirmou a súa petición inmediata de dimisión de Baamonde por “conduta pouco ética” esixindo explicacións á Almuíña.