Cicloturismo pola Ribeira Sacra

Evento organizado polo Inorde e Turismo de Galicia
Os ciclistas polo Concello da Teixeira.

Luintra | O evento “A Ribeira Sacra Cycling Road”, que organizou por primeira vez o Instituto Ourensán de Desenvolvemento Económico (Inorde) co apoio da Axencia de Turismo de Galicia, tivo co padriño de excepción a Abraham Olano, campión do mundo no ano 1995 e tamén gañador de La Vuelta España. Emma González, xerente do Inorde, acompañada por autoridades locais e autonómicas, foi a encargada de entregar unha placa conmemorativa a Olano á saída da proba en Luintra.

Este evento contribuíu a divulgar e a promocionar unha das zonas emblemáticas da provincia como é a Ribeira Sacra, amosando a través do deporte a riqueza natural, paisaxística e patrimonial que ofrece este territorio.

A proba, que transcorreu polos municipios de Nogueira de Ramuín, O Pereiro de Aguiar, Esgos, Xunqueira de Espadanedo, Parada de Sil, Montederramo e A Teixeira, reuniu a 335 participantes dos que preto do 40% procedían de fóra de Galicia (Madrid, León, Asturias, País Vasco…).

Ademais, a marcha cicloturista contou con deportistas profesionais como Iván Feijóo ou Carlos Canal, o único profesional galego que participou en La Vuelta España e que non quixo perderse esta cita na Ribeira Sacra.

Os deportistas participaron nun dos tres posibles percorridos ofrecidos: gran fondo de 115 quilómetros e +2700 metros de desnivel; medio fondo de 100 quilómetros e +2200 metros de desnivel; e o mini fondo de 65 quilómetros e +1400 metros de desnivel.

“A Ribeira Sacra Cycling Road” contou cun tramo cronometrado con circulación libre que incluía a última subida, con ramplas do 24%. Así mesmo, os tres primeiros de dito tramo recibiron un premio especial.

A proba non competitiva, finalizou coa seguinte clasificación: o primeiro posto do mini fondo foi para José Antonio Figueiras; Anxo Cid do Club CC Antelano logrou o primeiro posto do medio fondo; e David Mayo do Club Ciclista León foi o gañador do gran fondo e do tramo cronometrado.

Esta marcha cicloturista é unha das probas que forma parte do convenio asinado entre o Inorde e a Axencia de Turismo de Galicia para colaborar entre ambas entidades na realización de diversas actividades de dinamización turística da provincia de Ourense.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.

Outros artigos

Os nosos anunciantes son importantes para nós.
Fainos o favor de desactivar o bloqueador de anuncios ou
engadir este sítio a túa lista branca.

Grazas!