Ponteareas | O BNG informou da decisión do goberno de Nava Castro de solicitar un préstamo a unha entidade bancaria por un importe próximo aos 3,4 M€, que deberá amortizarse até 2041, para poder facer fronte ao pagamento de obras xa executadas e doutras actualmente en marcha.
Entre estas actuacións figuran a Escola Infantil (523.000€), a humanización na contorna da Casa do Concello (506.000€), a nova Oficina de Turismo (140.000€) e a Residencia de Maiores (60.000€). Así mesmo, o Concello solicita 820.000€ para a terceira fase da nova praza de abastos, e outros 760.000€ para actuacións como a planta baixa dos Servizos Sociais, a creación de oficinas municipais ou a segunda fase do saneamento de Ribadetea. O BNG denuncia que o goberno trata de xustificar este novo endebedamento co cofinanciamento dos fondos europeos EDIL, cando a realidade é que só 540.000€ do préstamo, apenas o 16% do total, responden a esa finalidade.