Doade | A Consellería do Medio Rural continúa apostando pola combinación de coñecementos teóricos con formación práctica e especializada mediante a organización de saídas formativas para o alumnado dos centros de formación e experimentación agraria (CFEA). Deste xeito, o estudantado do ciclo medio en Aproveitamento e Conservación do Medio Natural e do ciclo superior en Xestión Forestal e do Medio Natural do CFEA Becerreá, visitaron esta semana as bases de medios aéreos de loita contra incendios de Marroxo Monforte) e de Doade (Sober).
A saída enmárcase dentro dos resultados de aprendizaxe e contidos dos módulos de prevención e defensa contra incendios forestais, co obxectivo de que o alumnado coñeza as características das bases aéreas que se utilizan no Servizo de Prevención e Defensa contra Incendios Forestais en Galicia. Por un lado, na base de Marroxo, aprenderon as características do heliporto e as ferramentas empregadas na extinción de lumes, así como a súa evolución ao longo do tempo. Por outro lado, na base de Doade, visitaron o aeródromo de ala fixa e aprenderon o protocolo de actuación ante un incendio forestal.