• Segue conectado
  • |

A Academia celebra o Día das Letras Galegas en Xinzo de Limia

A sesión extraordinaria co gallo do Día das Letras Galegas dedicado a Carlos Casares terá lugar no salón de plenos municipal da vila onde medrou

Xinzo de Limia

Xinzo de Limia

A Coruña | A Real Academia Galega celebrará mañá mércores, 17 de maio, o Día das Letras Galegas en Xinzo de Limia, a vila onde medrou Carlos Casares, o homenaxeado deste ano. A sesión extraordinaria da institución dedicada ao escritor terá lugar no salón de plenos do concello a partir das 11:30 horas e contará con intervencións arredor da produción literaria e a vida do autor a cargo da académica Fina Casalderrey e dos académicos Henrique Monteagudo e Xesús Alonso Montero.

O presidente da Real Academia Galega, Víctor F. Freixanes, será o encargado de pechar o acto, que poderá seguirse en directo a través da pantalla instalada na carpa que se montará na praza Carlos Casares.

Nado en 1941 na cidade de Ourense, Carlos Casares marchou a vivir con só catro anos a Xinzo de Limia, a vila da que seu pai era natural, e onde este exerceu como mestre durante décadas. A comarca da Limia deixou unha importante pegada na súa vida, reflectida na súa obra literaria.

O territorio da súa infancia e adolescencia foi o elixido para o acto central da Real Academia Galega neste ano dedicado á súa figura no que a institución tamén desenvolverá outras iniciativas noutros escenarios destacados da súa traxectoria. A RAG abriu en febreiro o Ano Carlos Casares coa presentación do proxecto web Primavera das Letras no CEIP Carlos Casares de Vilariño (Nigrán), onde estableceu o seu fogar, e a finais de ano celebrará un simposio sobre o autor.

Publicado o 16 Mai 2017 en A Coruña, Ourense, Portada.
AVISO: Esta entrada ten máis de seis meses dende a súa publicación. É posible que o contido esté desactualizado.
Síguenos na nosa canle en TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies