A Semana das Ciencias de Ponteareas desafía á COVID-19 e afronta a súa V edición

Con actividades online entre o alumnado e expertos científicos

Ponteareas | “A nosa natureza é sabia e nela podemos atopar solucións e axuda, por iso debemos velar pola súa protección. Nesta quinta edición da Semana das Ciencias de Ponteareas abordaremos a estreita relación entre a Vida Verde e a Vida Azul”. Así daba a benvida hoxe a alcaldesa en funcións e concelleira de Ensino, Cristina Fdez. Davila, aos centros educativos de Ponteareas, que ata o vindeiro día 16 participarán nas distintas actividades dunha edición que desafía á COVID-19 reformulándose para celebrarse de xeito seguro.

Por vez primeira, para dar cumprimento ás normativas COVID-19, as actividades presenciais pasan a ser en liña, sen perder a súa parte práctica. “Non quixemos renunciar a esta edición, por iso centramos os nosos esforzos en adaptar os seus contidos e formatos para facilitar a participación de todo o alumnado”, destacou Davila.

A actividade do Museo da Ciencia foi a encargada de inaugurar a programación conectándose co alumnado de sexto de primaria dos CEIPs Fermín Bouza Brey e Mestre Ramiro Sabell, tal como fará ao longo da semana co resto dos centros de primaria do concello.

O Museo da Ciencia mergullouse no fondos dos océanos e mares para achegarse ao coñecemento dos peixes de augas cálidas, das estrelas de mar, das esponxas, dos mamíferos con forma de peixes como as baleas, as focas ou os golfiños, pasando polo distintos estados da auga e adentrándose na importancia da protección do medio ambiente para evitar a contaminación ou o desxeo, sen esquecerse de coñecer a orixe de todo: as células animais e vexetais.

Jesús Fernández e Amparo Francos, do Museo da Ciencia, salientan a importancia de ofrecer ao alumnado esta actividade prácticamente única en Galicia que este ano reta todas limitacións e ofértase de xeito on line incluíndo experimentos e demostracións prácticas da teoría estudada durante a videoconferencia incluíndo probas empregadas en afamados programas de televisión.

Alumnado e profesorado, parte activa
A semana do 12 ao 16 de abril brindará a oportunidade ao alumnado e profesorado de escoitar e conversar con expertas científicas do Campus do Mar da Universidade de Vigo, como a doutora Noelia Estévez Calvar; coas profesoras da Facultade de Química do Campus de Ourense, Elena Falqué López e Mª Concepción Pérez Lamela e coa profesora Patricia Puga Gómez sobre as plantas silvestres comestíbeis.

O CIFP A Granxa impartirá o seminario para profesorado “Hortas Escolares” e o alumnado exporá os seus coñecementos no seu Congreso, que contará cun apartado específico na páxina web da Semana das Ciencias. No sitio web tamén se exporán os experimentos científicos que cada centro escolar realizará a través de vídeos didácticos que poderán ser consultados por todos os públicos e servirán, a súa vez, de recurso educativo para os centros.

“A Semana das Ciencias sigue afondando na importancia da investigación e insistindo en achegar a ciencia á cidadanía e, nesta edición máis concretamente, ao alumnado dos nosos centros escolares que son parte activa xunto ao seu profesorado, sendo protagonistas e tendo unha plataforma que amose os seus coñecementos”, explica Cristina Fdez Davila.

Alumnado e profesorado, así como a Federación de Anpas de Centros de Ensino Públicos do Condado-Paradanta e Louriña (Fanpo), valoran moi positivamente esta iniciativa que financia na súa totalidade a concellaría de Ensino.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.

Outros artigos

Os nosos anunciantes son importantes para nós.
Fainos o favor de desactivar o bloqueador de anuncios ou
engadir este sítio a túa lista branca.

Grazas!