Nigrán | Servizos para as empresas, xeración de emprego de calidade, atracción de talento e unha aposta firme pola sustentabilidade, a eficiencia enerxética e a vangarda arquitectónica. Con esta ecuación defínense as catorce novas naves da Zona Franca de Vigo no Parque Empresarial de Porto do Molle, en Nigrán, que se inauguraron este xoves coa asistencia de máis de 150 persoas do ámbito institucional, empresarial e social da área de Vigo.
O evento, amenizado pola Banda Agrupación Musical de Matamá e do grupo “A boa vida”, contou coa presenza do delegado do Estado na Zona Franca de Vigo, David Regades; do delegado do Gobierno en Galicia, Pedro Blanco; do subdelegado na provincia, Abel Losada; así como dos alcaldes de Nigrán, Gondomar e Vigo, Juan González, Francisco Ferreira e Abel Caballero, alén de responsables e traballadores das empresas das naves e do resto de compañías instaladas en Porto do Molle.
Previamente ao acto de inauguración, os representantes institucionais realizaron unha visita previa a Kreios Space, Egatel e Nort3D, tres das doce empresas instaladas, onde departiron cos seus responsables e o seu persoal. O evento tamén contou coa plantación dun camelio nun dos xardíns con céspede e flores do recinto, “como chiscadela á sustentabilidade deste parque, dixo David Regades, como homenaxe á flor de inverno das Rías Baixas que tantas veces relatou Emilia Pardo Bazán, e ás raíces que o mesmo que esta árbore sentarán as doce empresas que xa están aquí traballando”.
Na súa intervención, o delegado do Estado mostrou “o gran orgullo que temos na Zona Franca porque estas catorce naves modulares representan de forma moi clara o estilo dos equipamentos que poñemos ao dispor do tecido empresarial: naves e oficinas dun deseño avanzado, innovadoras, eficientes e sostibles”. Regades agradeceu ás empresas da área de Vigo e Galicia o “gran interese que mostraron para poder trasladarse a traballar a un parque como Porto do Molle, tanto, que practicamente cando terminamos as obras, as naves e oficinas xa tiñan moitos candidatos”. “Este Parque Empresarial, dixo o delegado, é unha das xoias de Zona Franca e un modelo de sustentabilidade e innovación en todo o Estado. Quen o fai posible son as empresas e a todas as que están instaladas aquí quero agradecer o seu traballo, o seu compromiso e a súa complicidade”.
A CEO e cofundadora de UARX Space, Yanina Hallak, que interveu como responsable dunhas das empresas referentes do Parque Empresarial, sinalou que “desenvolver un proxecto tecnolóxico no parque de Porto do Molle é un privilexio de poucos. Benvidos e parabéns a todas as novas empresas e proxectos que se suman a este parque tecnolóxico, souberon elixir moi ben”. Hallak recibiu felicitacións no acto tras confirmarse que comezou a conta atrás para OSSIE, que xa está instalado no vehículo de lanzamento co que viaxará ao espazo e só queda por confirmar a data. OSSIE é o primeiro vehículo de transferencia orbital fabricado en España (en Porto do Molle) e con tecnoloxía que só dispoñen outros 5 fabricantes no mundo.
Pola súa banda, o delegado do Gobierno en Galicia, Pedro Blanco, destaco que o novo complexo empresarial “representa un novo paso na transformación económica de Vigo e da súa comarca”, ao crear un espazo con capacidade para atraer investimentos, xerar emprego cualificado e impulsar sectores estratéxicos como o aeroespacial. O delegado subliñou que “Galicia está a vivir unha nova revolución industrial”, baseada nunha industria máis avanzada, tecnolóxica e innovadora, e reivindicou o papel do Gobierno de España como “o mellor aliado das empresas”, apoiando investimentos, infraestruturas e proxectos estratéxicos que contribúen á modernización do tecido produtivo. Neste sentido, puxo en valor o traballo da Zona Franca e das empresas que apostan por asentarse en Porto do Molle e asegurou que o Goberno continuará traballando “ao lado de Galicia, de Vigo e das empresas” para impulsar máis actividade económica, emprego e oportunidades.
Finalmente, Abel Caballero, como presidente da Zona Franca e alcalde de Vigo, destacou que “estas catorce naves son moito máis que novos espazos empresariais: son industria, innovación, emprego de calidade e futuro para Vigo e toda a súa área”. Cabaleiro sinalou que “esta é a Zona Franca que queremos e que estamos a construír, unha Zona Franca con ambición, ao servizo da economía e das empresas, capaz de xerar as condicións para que o talento quede aquí e para que novas compañías queiran vir instalarse”.
As novas naves
O complexo das catorce novas naves nas parcelas 6.02 e 6.03 de Porto do Molle tivo un orzamento de 11.527.544,55 euros, financiado integramente polo Consorcio. As naves son modulares e levántanse nun recinto de 11.070,47 #m² de superficie construída total. Dispoñen de 10 metros de altura de naves con 8 de altura libre interior e contan coa certificación enerxética A. O recinto conta tamén con 67 prazas de aparcamento, 5 delas adaptadas, e dispón de 2 prazas de recarga eléctrica desde paneis fotovoltaicos.
O arquitecto responsable do proxecto, Pablo Menéndez Paz, expuxo a construción dun complexo empresarial e industrial nas que convivisen naves, talleres e oficinas. O obxectivo foi preservar a integridade dunha gran instalación industrial e o seu programa, e simultaneamente proporcionar unha contorna luminosa, optimista e atractivo achegando un valor engadido ás empresas usuarias e os seus visitantes. A cuberta das naves con forma en dente de serra, tan característico na tipoloxía construtiva industrial, proporciona unha lectura clara da función do edificio alén de abundante luz e ventilación natural aos espazos interiores. A través do espazo modulado e a luz natural que atravesa a xeometría da cuberta fracturada, o edificio é capaz de manter unha planta racional, mentres proporciona unha forte conexión coa paisaxe visual.
As empresas
As doce compañías que acolle o novo recinto en Porto do Molle teñen como factor común a innovación, sendo nalgúns casos referencias nacionais e internacionais na súa actividade. É o caso de Kreios Space, Alén Space, ou CENTUM, por exemplo, con numerosos recoñecementos no sector aeroespacial e aeronáutico; Egatel, compañía tecnolóxica de fabricación electrónica avanzada, ou Nort3D, especializada en tecnoloxía 3D.
Tamén están instaladas Hinvengrup, enfocada ao desenvolvemento de novas tecnoloxías para a automoción e o sector industrial; Kercus Cientific para distribución de equipamento médico e produtos sanitarios en materia veterinaria; Ecoafrik, de apoio e protección á biodiversidade e hábitos mariños de África; Tetsuprec, empresa de mecanizado industrial; Fish Factory con marcas como A Curiosa ou Luliña, dedicada á comercialización de conserva de peixe e mariscos; Diverso Laundry, empresa de servizos de auto lavandería e tinturería; e Bracken Bridge, de deseño, patronaje, corte, confección e showroom, cun enfoque sostible e dixital.