Vigo | A Zona Franca de Vigo ofreceu á Axencia Europea de Control da Pesca, con sede en Vigo, iniciar unha colaboración para facer estudos do sector.
O delegado do Estado, David Regades, e a directora da axencia, Susan Steele, mantiveron unha reunión na que se puxeron en común as actividades das dúas institucións públicas, unha do Estado español e outra da Unión Europea, e as posibles vías de traballo conxunto.
David Regades explicou que “en Zona Franca temos experiencias exitosas co ámbito da pesca, tanto a través da colaboración con Conxemar e o seu informe anual do sector do conxelado, que é único en Europa, como coa Cooperativa de Armadores de Vigo, Arvi, a través dun estudo das sociedades mixtas pesqueiras, que será pioneiro e poñerá sobre a mesa por primeira vez uns datos que ata o de agora non se analizaron.
Agora poderemos iniciar unha nova vía de estudo”. Engadiu David Regades que “as industrias vinculadas ao mar e a economía do mar forman parte da esencia e o nacemento da Zona Franca de Vigo e contamos cunha aceleradora do sector, MarExterior, e somos socios no programa POCTEP da UE Sherpa do Mar”.
Susan Steele sinalou que “a innovación é importante para o futuro da pesca sostible en Europa. A Axencia está moi centrada no seu mandato e comprométese a facer de ponte con outros organismos da Unión Europea que estuden tamén sobre os temas relacionados co océano”. Segundo os datos de Ardán, todo o sistema produtivo da pesca, que inclúe actividade extractiva e acuicultura, transformación e distribución de produtos da pesca, xerou un valor económico en 2021 para Galicia superior a 1.100 millóns de euros.
Máis ou menos as empresas rexistraron un incremento do seu valor engadido bruto próximo ao 17%, respecto ao ano 2020. Esta cifra supón aproximadamente o 5% de todo o valor económico achegado polo tecido empresarial galego ao PIB. Ademais, o sistema produtivo da pesca é o responsable de 1 de cada 20 postos de traballo directos en Galicia.
