O Porriño | Concello e técnicos da Xunta abordaron a mellora de accesos ao centro urbano do Porriño. Trátase concretamente da Avda. Buenos Aires e da rúa Progreso, ambas de titularidade autonómica, nas que se analiza acometer melloras tanto do firme como das beirarrúas.
Así, técnicos da consellería de Infraestruturas visitaron esta semana a zona acompañados polo alcalde, Alejandro Lorenzo, para valorar o estado no que se atopa e puideron comprobar as deficiencias existentes co fin de elaborar un proxecto de acondicionamento e mellora destes viais.
“Trátase de dúas rúas moi transitadas que necesitan dunha intervención urxente, pois falamos dun dos accesos principais ao centro urbano”, explicou o rexedor. “Contamos co compromiso firme da Xunta para esta e outras intervencións noutros viais de titularidade autonómica no noso municipio, tal e como nos confirmou a conselleira de Infraestruturas, Ethel Vázquez”.
O alcalde apunta que as melloras nos viais do municipio non se limitarán a estas zonas. “Para iso elaboramos un plan de melloradas beirarrúas e viais que permitirá un acondicionamento integral dos espazos urbano do municipio”, concluíu o rexedor, “Unha planificación viable que inclúe varias actuacións a curto e medio prazo moi reclamadas pola veciñanza, tanto no centro urbano como nas parroquias”.
O CIM atendeu preto de 600 persoas en 2021
O Centro de Información á Muller (CIM) do Porriño, ubicado no Concello, atendeu o ano pasado un total 590 consultas, a maioría delas demandando atención psicolóxica e asesoramento xurídico en casos de violencia de xénero.
Poñendo o foco nas cifras destaca a atención ás vítimas de violencia machista que ascende a 189 consultas. As referentes a atención psicolóxica foron 222, 30 as demandas de terapia psicolóxica, 57 as consultas sobre dereito de familia e dúas de orientación de emprego.
Cabe destacar estes datos son os que reflicte o informe estatístico autonómico, pendente de actualización que elevaría sensiblemente o número de consultas por cada usuaria.
Un servizo confidencial, personalizado e gratuíto
O Centro de Información á Muller ten como obxectivo favorecer e impulsar a participación da muller, en igualdade de condicións, na vida política, social e económica do Porriño. O seu equipo está formado por unha asesora xurídica e un psicólogo que realizan un importante labor como porta de entrada ás administracións para as mulleres en situación de vulnerabilidade, proporcionándolles asesoramento xurídico, atención psicolóxica e información en materia de recursos dispoñibles no ámbito territorial.
A entidade coordina diferentes actividades divulgativas dirixidas á promoción da igualdade e á eliminación da violencia machista.
Cabe destacar a atención especializada en casos de violencia machista, que proporciona ás vítimas asesoramento xurídico e psicolóxico (denuncias, ordes de afastamento e protección, entre outros), xestión do aloxamento alternativo e dos recursos necesarios nestes casos, tramitación da teleasistencia para as vítimas, apoio psicolóxico e colaboración con outros servizos de intervención en casos de violencia contra a muller como a Garda Civil, as casas de acollida e outros servizos públicos.
Tamén gardan unha estreita colaboración co corpo da Policía Local, que fai seguemento das vítimas de violencia de xénero, que actualmente ascenden a nove mulleres residentes no Porriño, protección á vítima, evitar a dobre vitimización e comunican os casos que nos que se interveñen.
“É moi importante que as mulleres saiban que o servizo que se ofrece é totalmente gratuíto, personalizado e confidencial, e que se respecta en todo momento o anonimato e a súa vontade na busca de posibles solucións aos seus problemas”, explicou a concelleira de Igualdade, Carolina González.
No mesmo sentido se manifestou o alcalde, Alejandro Lorenzo, que animou “a todas aquelas mulleres que estean atravesando unha situación de vulnerabilidade a pedir axuda no CIM. Alí atoparán a un equipo de profesionais dispostos a axudalas e guialas na procura dunha saída ao problema que atravesan. Deben saber que non están soas”
