O Mercadillo do CCA de Carballo trasládase este ano aos comercios

O cambio de formato trata de evitar os riscos das masificacións, ao tempo que reforza ao comercio carballés como “comercio seguro”

Carballo | Volve o Mercadillo do Centro Comercial Aberto, ou, mellor dito, o “Merca e Dillo”, como se anuncia nos carteis desta atípica edición. “Meditouse moito se levalo a cabo ou non”, recoñeceu hoxe, na presentación da actividade, o presidente do Centro Comercial Aberto, Ricardo Pallas. E finalmente optouse por mantelo, pero celebrándoo nos propios comercios para “evitar masificacións” e, ao mesmo tempo, poñer en valor todas as medidas de prevención da COVID-19 que se aplican no comercio carballés e que o converten nun “comercio seguro”, en palabras de Ricardo Pallas.

O presidente do CCA estivo acompañado na presentación por outros membros da xunta directiva e polo alcalde de Carballo, Evencio Ferrero, que reiterou o compromiso do goberno municipal cun sector estratéxico para a economía local. “Carballo é comercio, é un punto de encontro e de compras, e é importante que a xente veña e merque”, dixo. Nese sentido, o alcalde valorou especialmente que ante unhas circunstancias excepcionais se buscasen “solucións enxeñosas”, e fixo un chamamento especial á precaución e á prevención ante a incidencia do coronavirus: “Hai que cumprir os tres M: Máscara, 2 Metros de distancia e lavado de Mans”.

O Mercadillo do CCA celebrarase do 28 ao 30 de agosto, nas mesmas datas que Berocasión e coincidindo co feirón do domingo 30. Os 31 establecementos participantes _entre eles 5 dos novos 15 socios que veñen de facerse a través dunha campaña de captación_ estarán abertos o venres e o sábado de 10:00 a 14:00 e de 17:00 a 20:30 horas, e o domingo, de 10:00 a 14:00. Entre as novidades tamén figura un sorteo de tres premios de 300 euros, para o cal haberá que gardar os recibos das compras. O que non cambia, como sinalou o presidente do CCA, é que se ofrecerán “os mellores prezos posibles”. Ricardo Pallas rematou co desexo de que a iniciativa “sexa beneficiosa para comerciantes e clientes”.

Publicado o 20 Ago 2020 en Carballo, Comercio, Portada.
Síguenos na nosa canle en TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies

Os nosos anunciantes son importantes para nós.
Fainos o favor de desactivar o bloqueador de anuncios ou
engadir este sítio a túa lista branca.

Grazas!