O Covelo presentou a súa produción local na Feira SALIMAT de Silleda

O Concello apostou polo emprendemento no rural

O Covelo | Visibilizar o produto local, potenciar o rural como lugar onde emprender e vender calidade son algúns dos obxectivos da liña de promoción e apoio aos produtores do Concello de Covelo na que traballa o grupo de goberno segundo adianta a concelleira de Emprego e Formación, Lourdes Enes.

Con este fin, Concello e produtores participan na feira SALIMAT ABANCA dende hoxe e ata o 2 de xuño. Nun stand do Concello, financiado con fondos propios, promocionaranse e
venderanse produtos locais como caracois, capón de granxa, mel e carne, entre outros
produtos. Deste xeito o Concello ofrece aos emprendedores locais que apostan polo agro un escaparate no que presentarse.

“Estaremos ubicados nun punto central de moito tránsito de público entre dous stands de Andalucía. Cremos que debemos potenciar as posibilidades e potencialidades das nosas
terras que son capaces de producir e de lanzar ao mercado calidade”, explica a concelleira.

Nesta feira ademais, manterán contacto con distribuidoras, empresas proveedoras e
comerciais coas que poderán establecer alianzas e negocios e detectar oportunidades de
negocio. Tamén poderán tomar contacto con outras e outros produtores e aprender da súa
experiencia. “Nas feiras podemos coñecer de preto como traballan outros emprendedores e tamén temos a ocasión de traballar en equipo entre as e os produtores locais e así sacarlle o máximo rendemento ás nosas sinerxias”.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.