O Covelo destina 386.187,35€ a mellorar espazos e servizos públicos

No marco da Liña 1 do Plan +Provincia da Deputación de Pontevedra

O Covelo | O Concello de Covelo investirá 386.187,35€ de fondos propios, provintes da liña 1 do Plan +Provincia, en melloras en nove das catorce parroquias, nas restantes realizaranse distintas intervencións ao abeiro de subvencións e liñas de financiamento de outras administracións e liñas de financiamento.

O goberno local dirixido polo alcalde, Pablo Castillo, adianta que estas melloras están enfocadas a mellorar os servizos e espazos públicos que forman parte do día a día das persoas.

Estes preto de catrocentos mil euros destinaranse a pavimentación de camiños municipais en A Lamosa, Barcia de Mera, Casteláns, Godóns, Maceira, Paraños, San Salvador de Prado, Santa Marina e Santiago de Covelo sumando un total de 160.669,85€. Outro dos grandes investimentos será a cubrición e renovación do parque infantil do CEIP Antonio Blanco Rodríguez cun investimento de 50.239,15€4€, unha obra que permitirá que o alumnado e a veciñanza poida gozar deste espazo ao longo de todo o ano.

Ademais, o Concello destina 51.317,74€ á dotación de doce prazas novas de aparcamento e adaptación e repintado de 31 prazas xa existentes no núcleo urbano de Covelo. Na parroquia de San Estevo de Casteláns cubrirase a zona de nichos e adaptaranse os aseos no cemiterio público cun orzamento total de 25.922,59€.

No depósito de augas de Barcia de Mera realizarase unha intervención de limpeza e impermeabilización con colocación de nova valvulería cun custo de 24.998,39€. No barrio de Carradás executarase un colector de augas pluviais e outro de fecais así como a renovación de pavimento que ascende a 24.998,39€.

Para a posta en valor do patrimonio etnográfico e histórico o Concello investirá 32.175,88€ na reforma interior da escola de Redondo, en Barcia de Mera, onde tamén se creará un espazo interior polivalente para exposicións, cursos e actividades e unha zona de vestiarios. Con esta mesma intención tamén se rehabilitará o lavadoiro na Poza Grande de Piñoi, en Santa Marina, dotándoo dun espazo de lecer e cun orzamento total de 22.757,31€.

Por último, o Concello informa que procederá a homoxeneizar as placas de numeración dos fogares coa entrega de placas actualizadas, actuación que suporá un investimento de 18.106,44€. O alcalde sinala que a partida deste ano do Plan +Provincia da Deputación de Pontevedra incrementouse nun 10% respecto á anualidade anterior.

II fase de niveis libre de patinaxe
O Concello de Covelo recibirá a 270 patinadoras e patinadores de clubs e patinaxe da provincia de Pontevedra e Ourense que competirán na segunda fase de niveis 1, 2 e 3 de patinaxe libre.

Organizada polo Club Covelo Patinaxe Artística esta proba conta co apoio de Deporte Galego da Xunta de Galicia e atraerá a centos de persoas ao Concello de Covelo durante os días 4 e 5 de maio. O Club organizador convida a todas as persoas a participar deste espectáculo deportivo xa que a entrada é gratuíta.

No encontro participarán o Club Bolboreta de Redondela, o A.D Sobre Rodas, o Ribex, o Arealonga Chapela, o AEHDE, o Rodeiras e o Castrelos. Tamén o Carpa, Valladares, Blossom, Luar, Salvaterra, Ánfora, Coruxo e Gondomar. Ademais o domingo será o turno do Eixo Gondomar, Balaídos, Nigrán, Condado, Soutomaior, Vagalume, Ourela, Patín Porriño, Tea, Covelo, El Olivo e Indalo. O Plan de obras e servizos de competencia municipal (Plan +Provincia) 2024 é de carácter anual e está destinado a colaborar nas obras e nos servizos de competencia municipal dos 59 concellos de menos de 50.000 habitantes da provincia.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.