• Segue conectado
  • |

O alumnado da Escola Municipal de Hostalaría participa no proxecto de cociña solidaria iniciado hoxe

Carballo | Todo o alumnado da Escola Municipal de Hostalaría de Carballo respondeu afirmativamente ao convite para participar no proxecto de cociña solidaria iniciado hoxe. “Dende o primeiro contacto que tiven con eles amosáronse moi ilusionados coa iniciativa e temos case un 100% do alumnado. Só hai unha persoa que non pode estar porque empezou a traballar e non lle resultaba compatible o horario”, explica Fernando Agrasar, director da escola. Deste xeito, os seus alumnos e alumnas participarán por quendas na elaboración de comida para familias carballesas en situación de vulnerabilidade.

As entregas de comida elaborada a familias en situación de vulnerabilidade realizaranse de martes a venres, incluídos os festivos, por quendas

As primeiras achegáronse hoxe ata o Fórum Carballo para recoller un menú composto por croquetas de bacallau ao pil-pil e filetes de lombo de porco con pisto de verduras e pataca cocida, aproveitando a doazón realizada ao Concello de Carballo polas empresas Seragra, Cultiagro e Patatas Gómez Vázquez. O próximo día terán crema de porros e polo asado con verduras e arroz en branco. “Intentamos facer o máximo número de comidas e coa mellor calidade posible _sinala Fernando Agrasar_. Empezamos con algo máis de 200 á semana, que poderán ir aumentando segundo as necesidades”.

Porque o principal obxectivo deste proxecto, como apunta o directo da Escola Municipal de Hostalaría, é “axudar á xente máis necesitada”. E, ao mesmo tempo, a experiencia resulta unha oportunidade única para que o alumnado “vexa como se cociña nestes grandes formatos, porque non é o mesmo cociñar para 15 ou 20 persoas que para 90 ou 100”.

A primeira xornada transcorreu dun xeito moi ordenado, sen aglomeracións nin necesidade de intervención do voluntariado de Protección Civil que se achegou ata o Fórum Carballo para colaborar. Tamén se desprazaron ata as instalacións da Escola Municipal de Hostalaría o concelleiro de Formación e Emprego, Iván Andrade, e a concelleira de Igualdade e Benestar, Maica Ures.

Iván Andrade destacou a experiencia de Fernando Agrasar, que xa vén colaborando coa ONG do chef José Andrés no proxecto do comedor solidario do Banco de Alimentos da Coruña, e engadiu que grazas a esta iniciativa será posible achegar “unha alimentación saudable e variada a familias necesitadas do Concello”.

A maior parte desas familias son usuarias dos vales de alimentos da Concellaría de Igualdade e Benestar, que vén detectando un aumento das necesidades durante a actual crise sanitaria. “Xa dende o primeiro momento, vendo que as necesidades aumentaran, decidimos incrementar as contías dos vales de alimentos, e agora vese incrementada aínda máis con esta nova axuda que ofrecemos dous días á semana, de martes a venres, incluídos os festivos”, comentou Maica Ures. A concelleira tamén explicou que, a maiores, no proxecto participan persoas usuarias de APEM e Aspaber que viven soas, e nestes casos ofréceselles o servizo a diario a través das propias entidades.

Publicado o 29 Abr 2020 en Benestar Social, Carballo, Portada.
Síguenos na nosa canle en TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies