Ponteareas/PPdeG | O Grupo Municipal do PP denuncia a falta de investimento en Ponteareas que vén arrastrando o Goberno bipartito nos dous últimos anos.
“Non o dicimos nós, senón a conta de liquidación de 2020. Dos 13,5 millóns orzados executáronse 2,6 e non poden achacalo á pandemia, porque o resto de Concellos cumpriu coa súa folla de roteiro. Ademais, é unha situación que xa se repetiu en 2019, ano anterior á pandemia, na que o bipartito deixou sen executar máis do 80% da partida prevista para investimento”, explican os populares.
Os populares levarán varias preguntas ao consistorio para coñecer que está a pasar e cal é a realidade da situación económica-financeira. “Dos 4 millóns de euros que recibiron de fondos europeos para renovar a iluminación pública non utilizaron, supostamente, nin un. Dos fondos europeos 5 millóns da EDUSI, concedidos a Ponteareas en 2016, só se executou o 20%, o que pon en risco a axuda concedida”.
“O PP lembra ao bipartito que hai investimentos que non poden esperar máis”
O PP lembra ao bipartito que hai investimentos que non poden esperar máis. “Falamos dos 300.000 reservados para a rehabilitación de centros culturais como Guillade ou Padróns. O mesmo sucede coas partidas que fan referencia aos compromisos de ampliar a depuradora, saneamento en Ribadetea e outras parroquias ou o desenvolvemento do Plan Parcial da Lomba”.
O PP lamenta que mentres a partida de investimento queda sen executar a de gasto por salarios séguese incrementando ano tras ano.
Rexeite total ao novo trazado da A-52 e N-120
O Grupo Municipal do PP puido ter acceso ao proxecto que baralla o Goberno de Sánchez para executar a variante de Ponteareas, a cal non conta con partida económica nos Orzamentos Xerais do Estado despois de que o Goberno PSOE-Podemos eliminase os 21 millóns de euros que deixara o Goberno do PP, en 2018, para esta infraestrutura.
“Nefasto. O trazado que propoñen non ten outro cualificativo. Todas as propostas desembocan nas parroquias de Areas, Arnoso ou Xinzo, cuestión que nos parece inadmisible e que supoñería un novo atraso”, explican os populares.
“Nefasto. O trazado que propoñen non ten outro cualificativo”
O PP lémbralle o Goberno Centtral que no ano 2019, por parte do Ministerio de Fomento xa se falou do trazado da Variante, desde a saída na A52 (Angoares), e desvío polo marxe oeste do centro urbano, con saída na N-120 por encima do Instituto O Barral, asegurándose que se reducía considerablemente o tráfico pola parroquia de Angoares e os tráficos pola N-120, entre as parroquias de Xinzo, Areas, Arnoso e ata o cruzamento de Mondariz, onde a diario prodúcense grandes atascos e onde moitas familias foron vítimas de accidentes de tráfico.
Tamén, no Plan Urbanístico de Ponteareas (PXOM), desde a súa aprobación inicial, no ano 2013, o trazado da Variante é o mesmo, e agora, no ano 2021, no mes de xuño, demos un “paso atrás” na consecución desta infraestrutura, porque o Ministerio non fai o estudo de impacto ambiental, como procede, da Variante no trazado acordado, expuxo dúas novas alternativas de trazado, onde para maior sorpresa, a primeira opción que se expón non é a existente, senón unha nova que arrincaría na A52, pero sairía na N-120 á altura da parroquia de Areas, proposta que non solucionaría o problema existente senón que o agravaría, ademais das afeccións deste novo trazado nas parroquias de Guláns, Areas, Arnoso e Xinzo.
Os populares reuníronse a semana pasada coa Plataforma de Afectados da N-120 para explicar este cambio de criterio, o atraso que isto supón e os prexuízos destas novas propostas, entregándolles copia do documento e planos que publicou o Ministerio na súa web no mes de Xuño. “Imos presentar unha moción urxente para que o pleno posiciónese en contra deste cambio, o Goberno local, que nos consta que son coñecedores, debe explicar e mostrar a súa opinión en referencia a esta modificación coa que parece están de acordo. Un novo pau para Ponteareas, despois de perder 27 millóns de euros.
Por outra banda, en relación ás melloras na N-120, segue sen aparecer o proxecto que o ano pasado no mes de outubro, na Subdelegación do Goberno, presentaron a “bombo e prato” ante representantes da Plataforma e membros do Goberno, deixando fóra aos concelleiros da oposición.
“Desde ese momento, o Bipartito de Ponteareas está de brazos cruzados, sen esixir esa exposición pública dunha infraestrutura que levamos anos esperando, e que pola falta de xestión e liderado do BNG ponteareán, en Madrid, os socialistas quitáronnos o diñeiro que había nos Orzamentos”, explicou os populares.
