O Foro E. Peinador cumpríu 25 anos de actividades ininterrompidas para artellarmos o discurso da galeguidade empresarial con notabres resultados A súa constitución foi a continuidade dun labor emprendido pola Asociación de Funcionarios/as para Normalización Lingúística. Era unha necesidade para galeguizar o amplo espectro social do país. A literatura foi incapaz de tender pontes con eses sectores sociais que vivían noutra realidade paralela. Os protagonistas da creación literario asumiran un papel para o que non estaban preparados, de aí o seu fracaso. O que tiña que ser un obxectivo global acabou por convertese nun mérito persoal. No eido educativo, a teor dos resultados estatísticos, é evidente tamén a incapacidade dos docentes.
Os primeiros movementos para establecer un diálogo entre a lingua galega e a economía, nomeadamente os empresarios, empezou en 1989. Cómpre lembrar que foi a partir dese ano cando se produciron os primeiros achegamentos sendo a empresa de transportes de viaxeiros Castromil a que máis salientou pola espectacular asunción no réxime interno e proxección pública da lingua galega entre os viaxeiros.
Non debemos esquecer outras marcas como Electrodomésticos Sanluís, que durante unha década despregou campañas publicitarias en todos os medios de comunicación; os Supermercados Vego, que empezaran a introducir a lingua galega nas referencia comerciais nos tickes de compras e nos millóns de folletos publicitarios destinados ao buzoneo semanal nos edificios das grandes cidades, divulgando en lingua galega as denominacións das ofertas; e Seguros La Fe, unha empresa de decesos que artellou un programa de galeguización empresarial coa participación de coñecidos intelectuais que exerceron o seu maxisterio nos cursos de formación impartidos nas oficinas da sociedade en horas laborais que se repetiron axiña nas grandes empresas construtoras Malvar e Covsa, de Pontevedra, que chegaron a contar con senllas filológas.
A progresión da presenza do galego no sector industrial tamén foi decisiva coa incorporación do Estaleiro HJ.Barreras, Celtic Estores, Seguridade A-1, Itelsis e RLA Rodríguez López Auto, entre outras empresas.
“Capítulo aparte foi o labor desenvolvido no sector agroalimentario onde o Foro E. Peinador fomentou o uso da nosa lingua na etiquetaxe de botellas e envases de produtos diversos”
Capítulo aparte foi o labor desenvolvido no sector agroalimentario onde o Foro E. Peinador fomentou o uso da nosa lingua na etiquetaxe de botellas e envases de produtos diversos, dando lugar a unha organización específica denominada Irmandade de Agroalimentarios e Adegueiros. Hoxe podemos afirmar qui hai ao pé de duascentas marcas comerciais que etiquetan no noso idioma, salientando o 80% do leite e viño. No sector da alimentación aprézase unha avance da presenza do galego nalgunhas cadeas de supermercados.
Desde hai dous anos o Foro E. Peinador ten un acordo de colaboración coa Deputación de Pontevedra para estimular o uso da lingua galega en diversos ámbitos, entre eles o socioeconómico. A colaboración da Secretaría Xeral da Lingua Galega da Xunta de Galicia tamén axuda a este propósito.
O próximo día 15 presentaremos nun acto público na sede desta institución provincial en Vigo a “Guía Básica de galeguización empresarial”. Nela expoñemos as referencias legais para que as empresas incorporen a lingua galega nas súas actividades ao abeiro dos ordenamentos xurídicos xurídicos europeo, estatal e galego.
As medidas que se propoñen teñen en conta ás peculiaridades propias dos negocios e empresas, para que non haxa ningunha excusa para marxinar o noso idioma das páxinas webs, na sinalética, na telefonía, nas nóminas e contratación laboral, incluídas as cláusulas dos dereitos lingísticos de traballadores e consumidores,etc.
A perivivencia da lingua galega depende da súa presenza en todas as esferas da vida social, económica e nas institucións públicas. O compromiso con esta tarefa esténdese tamén ao ámbito familiar.
Xosé González Martínez. Presidente Foro E. Peinador.
