• Segue conectado
  • |

Gonzalo Caballero: “O PSOE é a referencia da esquerda e a mellor forma de vencer a dereita”

A ministra de Economía reivindica na Coruña que “a nosa preocupación polas persoas nótase en cada medida que tomamos no goberno”

A Coruña/PSdeG | O secretario xeral do PSdeG, Gonzalo Caballero, participou hoxe nun mitin na Coruña en compañía da ministra de Economía, Nadia Calviño, e chamou a “non perder un minuto” e traballar para convencer “a todos os progresistas” de que acudan a votar o vindeiro domingo ao PSOE de Pedro Sánchez.

“Non perdamos un minuto, necesitamos todos os votos dos progresistas. O PSOE é a referencia da esquerda e a mellor forma de defender a Galicia e de vencer ao PP, a Ciudadanos e a Vox”, apelou o líder dos socialistas galegos, consciente de que “non é o mesmo cando goberna o PSOE que cando goberna a dereita”.

E é que, como recalcou Gonzalo Caballero, os socialistas “permitimos o avance en dereitos e liberdades” fronte ao “risco de involución” que implican as tres papeletas da dereita. Por iso, profundou, “pido a mobilización masiva de todos os progresistas para que Pedro Sánchez teña unha maioría ampla e sólida”.

“Con forza e con ganas, cun sorriso e con argumentos para convencer, co orgullo de ter feito o mellor para o país cando gobernamos”, destacou o máximo dirixente do PSdeG, quen advertiu de que “por un voto se decide un goberno” e de que “non podemos levar un susto” como o ocorrido en Andalucía.

Compromiso con Galicia
Ademais, Gonzalo Caballero puxo en valor o compromiso con Galicia do goberno socialista, que exemplificou na inversión de máis de 4.300 millóns de euros para impulsar o sector naval público de Ferrolterra e crear 7.000 empregos.

Ao fío diso, aproveitou para reprobar que Feijóo, tras sete anos “calado” ante os incumprimentos con Galicia do goberno de Mariano Rajoy, agora pretenda introducir dúbidas sobre o compromiso da Xunta co sector naval.

Sobre todo, incidiu o secretario xeral do PSdeG, á vista de que o PP deixou o proxecto de construción das fragatas “nun caixón” porque “as prioridades” do anterior ministro de Defensa “estaban vinculados á súa empresa e non ao servizo público”.

“E agora queren confrontar cun goberno que toma medidas que favorecen ao PP”, recriminou o líder socialista, quen prognosticou “un retroceso do PP de Feijóo” o vindeiro domingo que “vai marcar o seu fin electoral”.

“Moita ilusión”
Tamén na idea do compromiso con Galicia fixo fincapé a ministra de Economía, Nadia Calviño, quen resaltou as principais medidas do goberno de Pedro Sánchez para que “o crecemento económico chegue ás persoas” e para “apoiar aos máis vulnerables”.

“A sostibilidade financeira ten que ir acompañada da sostibilidade social”, defendou a ministra coruñesa, quen asegurou que o executivo socialista “está traballando con moita ilusión” para combater a desigualdade.

“Traballamos polos dependentes, polos desempregados, polos pensionistas…”, reivindicou Nadia Calviño, quen asegurou que “a preocupación polas persoas nótase en todas as medidas que tomamos no goberno”.

Ademais, tal e como apostilou a titular de Economía, todas as medidas están encamiñadas a construír “a España que queremos para o futuro”.

“Tres dereitas”
A encargada de abrir o acto foi Inés Rey, a candidata á alcaldía coruñesa, quen prognosticou que os vindeiros presidentes da Xunta e do Goberno “serán socialistas”, ao igual que Pilar Cancela, número un pola Coruña ao Congreso, deu por feito a súa vitoria nas vindeiras eleccións municipais.

Así mesmo, puxo en valor a xestión feita polo goberno de Pedro Sánchez ao longo destes meses, mentres Pablo Arangüena, número dous da lista á Cámara baixa, recalcou que a única alternativa é a de “tres dereitas que compiten en falta de escrúpulos”, como amosaron os debates televisados.

Finalmente, o presidente da Deputación da Coruña, Valentín González Formoso, chamou a votar ao PSOE o vindeiro domingo para poder reeditar un goberno de progreso “sen ter que depender de ninguén”.

Publicado o 24 Abr 2019 en A Coruña, Política, Portada.
AVISO: Esta entrada ten máis de seis meses dende a súa publicación. É posible que o contido esté desactualizado.
Síguenos na nosa canle en TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies