Gómez Reino reúnese coa Asociación pola Recuperación da Memoria Histórica

Para recoller melloras ao anteproxecto de Lei de Memoria Democrática

Madrid/Unidas Podemos | O deputado de Unidas Podemos e voceiro de Galicia en Común, Antón Gómez Reino, mantivo esta tarde unha xuntanza coa Asociación pola Recuperación da Memoria Histórica, unha entidade que leva moitos anos loitando pola xustiza, a democracia e a reparación das vítimas do Franquismo.

A entidade trasladoulle ao deputado diferentes cuestións relacionadas co Anteproxecto de Lei de Memoria Democrática que o grupo parlamentario intentará mellorar coas aportacións da sociedade civil, de cara á construcción dun texto legal que se comprometa coa defensa da democracia. “Co Franquismo e o fascismo non debemos ser equidistantes, senón loitar por defender a memoria daqueles que nos trouxeron a democracia”, sinalou Gómez Reino.

“Co Franquismo e o fascismo non debemos ser equidistantes, senón loitar por defender a memoria daqueles que nos trouxeron a democracia”

Ademais, co obxectivo de avanzar nas cuestións de memoria democrática que afectan a Galicia, o deputado manterá mañá unha xuntanza co Secretario de Estado de Memoria Democrática, Fernando Martínez. Gómez Reino tratará temas que a sociedade civil, representada entre outras pola ARMH e a Comisión para a Recuperación da Memoria Histórica, lle trasladaron en relación a asuntos de tanta relevancia como a recuperación da Casa Cornide da Coruña, a necesidade de convertir a illa de San Simón nun lugar de memoria ou a nomenclatura do rueiro do arsenal militar de Ferrol.

Nese sentido, exporáselle a Martínez a preocupación do Grupo Parlamentario polos usos do Pazo de Meirás tras unha proposta da Xunta “que deixa fóra a outras administración implicadas na recuperación do Pazo, así como as propias asociacións”, sinalou Gómez Reino. O Pazo de Meirás debe ser “un lugar de memoria e tamén de cultura e a proposta unilateral da Xunta, á marxe do Estado e do Concello de Sada, non responde ao que significa o Pazo de Meirás, que non só era un lugar de veraneo do dictador, senón un sitio onde se tomaron decisión políticas no marco dos Consellos de Ministros”, lembrou Gómez Reino.

Outros artigos