Goberno provincial cualifica de “grotesca” a posición do PP sobre os Orzamentos 2023 da Deputación de Pontevedra

O deputado Carlos Font amosouse incrédulo diante das críticas polo volume de transferencias

Ponteareas | A “Emenda á totalidade” aos Orzamentos de 2023 presentada polo grupo do Partido Popular merece o cualificativo de “grotesca” para o Goberno provincial. O deputado de Economía e Facenda, Carlos Font, así o valora despois de examinar “os catro folios a dobre espazo e corpo 16 repletos de erratas cos que finxen emendar o milleiro de páxinas dos Orzamentos”.

Font lémbralle aos populares que unha emenda á totalidade consiste nun proxecto orzamentario alternativo “serio e rigoroso e non en pasar a limpo uns apuntes apresurados e premer o botón de imprimir”.

O deputado non sae do seu asombro de que se critique á Deputación de Pontevedra polas transferencias aos concellos, cando os datos anuais que publica o Ministerio de Hacienda sitúana como a que maior porcentaxe dos seus recursos totais transfire, cun 33,77%. Unha cifra que contrasta co 0,03% da Deputación de Ourense, que representa o modelo de xestión provincial do Partido Popular.

Font destaca que a Deputación de Pontevedra transfire, tan só no seu plan de Cooperación (Plan Concellos) un total de 44 millóns de euros, cifra que en Ourense queda en só 4,7 millóns de euros. Ademais Font cualificou como “moi reprochable” que o PP se permita dicir que o incremento anual do Plan Concellos, cun millón de euros adicional sobre o anterior, é “unha pedrea”.

“Non sería máis xusto dicir que aos concellos desta provincia toucoulles o Gordo en 2016 cando naceu o Plan Concellos? Coñezo a moitos alcaldes e alcaldesas de Ourense que, se puideran, pedirían o “traslado” á provincia de Pontevedra, porque alí reciben só 51.000 euros lineais”.

Carlos Font considera como “un erro de vulto” os cálculos do PP sobre unha suposta redución nas transferencias aos concellos. Confunden, explica, as transferencias finais (que son as que se reflicten na execución orzamentaria), cunha bolsa de crédito de 3 millóns de euros deseñada como unha previsión no Orzamento vixente para cofinanciar proxectos europeos.

Nestes momentos, engade o deputado, a Deputación xa ten concedidos 7,1 millóns de euros de fondos Next Generation e ten presentado proxectos para a provincia valorados noutros 28,9 millóns de euros. Este inxente volume de recursos, que totaliza 36 millóns de euros, irase incorporando vía modificación de crédito ao Orzamento de 2023 na medida en que se vaian concretando dende a Unión Europea, polo que as transferencias finais aos concellos non só non se reducirán, como di o PP, senón que se incrementarán moi substancialmente. “Os concellos sábeno ben porque están traballando con nós neses proxectos europeos”.

Ademais, o deputado subliña que se o financiamento local se resinte no actual contexto de escalada de custos dos subministros e da enerxía deberían buscarse solucións na Xunta de Galicia, que un ano máis conxela o Fondo de Cooperación Local básico, ou sexa a única achega regrada que o Goberno galego fai aos concellos en cumprimento da súa obriga constitucional. Os Orzamentos autonómicos para 2023 volven incluír a xa tradicional partida de 112,9 millóns de euros para repartir entre os 313 concellos galegos. Nin un céntimo máis dende hai máis dunha década, a pesar da inflación acumulada. Tamén recalca Font “a cara dura” de criticar os gastos en publicidade da Deputación de Pontevedra cando a Xunta de Galicia “despilfarra grandes cantidades en propaganda de clara intencionalidade partidista”.

Finalmente, o deputado de Economía e Facenda recoméndalle ao PP que aprenda a ler os Orozamentos provinciais para 2023, que fuxa dos eslogans (os mesmos dos anos anteriores) e que aborde o evidente problema do financiamento local cunha perspectiva realista “porque todo o mundo sabe que os concellos se financian cos tributos propios, coas achegas do Estado, da Xunta e da Deputación e en todo ese “mix” o que falla unha e outra vez é a Xunta”. “Se algunha Administración merece o epíteto de “anticoncellos” é a que conxela os fondos municipais regrados e berra día si e día tamén con aqueles concellos que non son da súa cor política”.

Na foto a presidenta da Deputación Carmela Silva e o vicepresidente Mosquera durante a presentación dos Orzamentos 2023.

Outros artigos