Elisa Posada, gañadora do concurso da mascarilla oficial La Vuelta 21 de Mos

Un deseño inspirado nas bandeiras galega, española e mosense

Mos | Mos xa ten a súa mascarilla oficial de La Vuelta 21. Elisa Posada González, de 16 anos, oriúnda de Vigo e estudante de 4º de ESO que o vindeiro curso escolar entrará no Bacharelato de Artes no IES de Mos, resultou ser a gañadora do concurso sobre a mascarilla oficial de La Vuelta 21, etapa que rematará no Castro de Herville de Mos o vindeiro 4 de setembro.

A alcaldesa mosense Nidia Arévalo recibiu a Posada González e aos seus orgullosos pais na Sala de Xuntas do Concello, na que felicitou á moza outorgándolle o pin que lle acredita como gañadora da mascarilla oficial de La Vuelta 21.

No acto tamén participaron a Concelleira de Educación de Mos, Julia Loureiro, o director do IES de Mos, Xurxo Collazo e o vicepresidente da ANPA do IES de Mos, Óscar Mariño Bastos, como representante das entidades que formaron parte do xurado do concurso, conformado por ANPAs, centros educativos mosenses, colexios e o IES.

Acompañada dos seus pais, Elisa Posada González (centro) explica o deseño da mascarilla á alcaldesa Nidia Arévalo.

Posada González declarou que o seu deseño gañador inspirouse “nas cores de Galicia, España e de Mos” para elaborar a mascarilla, sendo esta a primeira vez que participaba nun evento desta magnitude.

A alcaldesa Arévalo amosou as súas felicitacións á gañadora e confiou na posibilidade de que “os rapaces poidan estar presentes na etapa de La Vuelta 21 que pasará por Mos”, toda vez o permitan as condicións sanitarias motivada pola pandemia. Pola súa banda, o director do IES de Mos, Xurxo Collazo, informou que neste concurso presentáronse 33 deseños, superando o índice dos rexistrados en 2020.

De cara á etapa de La Vuelta 21 que pasará por Mos, o Concello anunciou que estanse a producir varios centos de unidades da mascarilla gañadora para ser entregadas como agasallo institucional na meta da etapa ciclística no Castro de Herville.

Outros artigos

Os nosos anunciantes son importantes para nós.
Fainos o favor de desactivar o bloqueador de anuncios ou
engadir este sítio a túa lista branca.

Grazas!