Ourense | O presidente da Deputación de Ourense, Luís Menor, mantivo unha reunión de traballo no Pazo Provincial coa directiva da Asociación Provincial de Talleres de Reparación de Vehículos (Atave), encabezada polo seu presidente, Ricardo Borrajo, co obxectivo de facer seguimento das liñas de colaboración existentes entre ambas entidades e explorar novas vías de cooperación de cara aos vindeiros anos.
Durante o encontro, Menor puxo en valor o papel que desempeña ATAVE como entidade representativa dun sector “estratéxico para a economía provincial, xerador de emprego e fundamental para a competitividade do tecido empresarial ourensán”. O presidente provincial destacou ademais a importancia do traballo que desenvolve a asociación no apoio aos talleres da provincia, especialmente nun contexto marcado pola transformación tecnolóxica do sector da automoción, a electrificación dos vehículos, a adaptación ás novas normativas e a necesidade de contar con profesionais cada vez máis cualificados.
Neste sentido, Menor trasladou á directiva de Atave a vontade da Deputación de manter a súa colaboración coa entidade, unha cooperación que nos últimos anos permitiu fortalecer a súa actividade e contribuír ao desenvolvemento de accións formativas e de apoio aos profesionais do sector.
Pola súa banda, os representantes de Atave agradeceron o respaldo institucional da Deputación e expuxeron os principais retos e necesidades que afrontan os talleres da provincia, incidindo especialmente na formación especializada, na captación de talento e na adaptación aos cambios que vive a industria da automoción.
A reunión serviu tamén para analizar posibles iniciativas futuras nas que poidan colaborar ambas entidades, co obxectivo compartido de continuar fortalecendo un sector que ten unha presenza destacada en todas as comarcas da provincia e que constitúe unha importante fonte de actividade económica e emprego.
Atave representa á práctica totalidade dos talleres da provincia de Ourense e desenvolve un importante labor de asesoramento, representación e formación dos profesionais do sector, sendo ademais un referente na cualificación de novos traballadores para dar resposta ás necesidades das empresas.