Concerto de Fin de Ano en Tui

Este venres 30 no Teatro Municipal con catro agrupacións tudenses

Tui | Seguindo a tradición Tui vai despedir o ano con música co Concerto de Fin de Ano que se vai celebrar o próximo venres, 30 de decembro, ás 20.30 h no Teatro Municipal, a cargo de catro agrupacións tudenses a Banda de Música Popular de Tui, a Coral do Centro Sociocomunitario de Tui, a Coral Polifónica Ponte das Febres e a Coral San Telmo de Tui, e baixo a dirección artística de Eloy Carrera.

Ao longo de 60 minutos as catro agrupacións ofrecerán un programa marcado polas composicións de Nadal pero no que haberá tamén oco para bandas sonoras.

Así o concerto comezará coa interpretación de “Los Chicos del Coro” pola Banda de Música Popular de Tui, para a continuación xa xunto coas tres corais ofrecer “Vangelis”. De novo só a banda tocará “Halleluja” para dar paso a interpretación conxunta de “Compañeira”, “Noche de Paz” e “Adeste Fidelis” xunto as corais do Centro Sociocomunitario, Ponte das Febres e San Telmo. O programa continuará con “We Are The World”, “Blanca Navidad”, “Feliz Navidad” e pecharase coa Marcha Radetzky.

As entradas para o concerto de Fin de Ano poranse á venda o próximo luns, 26 de decembro, ás 12h en tui.gal e poderán mercarse até o propio venres ás 20 h ao prezos de 4€ e 3€.

A Banda de Música Popular de Tui conta con máis de 140 anos de historia na que se formaron importantes músicos e músicas que hoxe en día percorren o mundo tocando en numerosas orquestras, en bandas ou impartindo clases como docentes superiores. No ano 2006 concedéuselle unha Mención Honorífica por todos os méritos contraídos ao longo da súa historia e por actuar como representante da cidade de Tui. Eloy Carrera Bernárdez é o seu director dende o ano 2019.

A Coral do Centro Sociocomunitario de Tui foi refundada no pasado ano 2021. Está formada por 32 compoñentes e as súas actuacións inclúen misas, aniversarios de voda, festivais e outras celebracións. O seu director é David González Sobrino.

A Coral Polifónica Ponte das Febres leva vinte anos de actividade, e conta con 31 compoñentes. O seu repertorio abrangue unha gran variedade de estilos e épocas, dende música renacentista, pasando por melodías tradicionais galegas. Na actualidade está dirixida Rafael Pérez Dopeso, quen guiou á coral en numerosas actuacións, como o I e II concerto de Habaneras da Deputación de Pontevedra.

A Coral San Telmo de Tui está conformada por 50 persoas e comezou a súa andadura no ano 2015. No ano 2016, organizou o I Encontro de Corais da Eurocidade e, cada mes de xuño, organiza o Festival de Corais e Música Tradicional. O seu director é, dende hai seis anos, Celso Diéguez Martínez.