BNG Porriño reclama novo colector pluvial para o centro urbano

O pleno municipal aprobou unha moción dos nacionalistas

O Porriño/BNG | O Bloque Nacionalista Galego (BNG) reclama a execución dun colector de pluviais para evitar desbordamentos no centro urbano. O Pleno da Corporación Municipal vén de aprobar unha moción presentada polo grupo municipal nacionalista para reclamar da Xunta recursos para acometer esta infraestrutura. O goberno de Alfonso Rueda rexeitou unha emenda aos orzamentos autonómicos presentada polo BNG neste sentido.

A zona centro do Porriño conta cunha rede unitaria, sen separación de augas residuais e pluviais, de diámetro reducido, o que provoca desbordamentos en días de moita choiva nos colectores do casco urbano.

É preciso a construción dun novo colector para pluviais, con diámetro suficiente para recoller o incremento de caudal nas épocas de choivas, que recolla na Avenida de Galicia as augas que proceden da Malladoura, dos colectores da autovía A52 e das rúas Coruña e Lugo para levalas directamente ao Louro evitando colapsar a rede do centro.

“O Porriño precisa dun novo colector que evite o colapso dos sumidoiros do casco urbano nas épocas de intensas choivas. O BNG ten reclamado a colaboración da Xunta para podelo executar a través dunha emenda aos orzamentos autonómicos de 2023, rexeitada pola maioría do PP no Parlamento Galego. Agora conseguimos un acordo plenario para esixir esta infraestrutura e agardamos que o goberno local cumpra a vontade do Pleno e reclame ante a Xunta esta necesaria inversión”, manifestou o portavoz do BNG, Pedro Pereira, quen amosou a súa preocupación por que os compromisos da Xunta na localidade sexan destinados só a obras “electoralistas” e “cosméticas” e non a paliar os importantes déficits estruturais que O Porriño ten.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.