Ourense | O Centro Comercial Ponte Vella de Ourense acolleu onte, 5 de novembro, a presentación da portada do número 23 da revista Nós, a Xente do Redor, nun acto cultural que congregou a numeroso público e no que se rendeu unha emotiva homenaxe a Xabier Casares, presente na celebración.
O encontro converteuse nunha auténtica festa da cultura, da amizade e dos afectos, cunha asistencia que superou as previsións da organización, ata completar a totalidade das cadeiras dispoñibles. Un dos momentos máis significativos da xornada foi a presentación da nova portada da revista, realizada polo recoñecido artista Miguel Ángel Martínez Coello, autor tamén dun retrato de Xabier Casares elaborado especialmente para esta homenaxe. Ambas as creacións artísticas contribuíron a dar un significado especial a unha celebración marcada pola emoción e o recoñecemento.
A presenza de Xabier Casares permitiu compartir con el as numerosas mostras de cariño e admiración dos asistentes, nunha homenaxe que puxo de manifesto a importancia de recoñecer e agradecer a traxectoria das persoas que forman parte da nosa comunidade cultural e humana.
A celebración contou coa participación de poetas, artistas, músicos e colaboradores vinculados ao proxecto cultural Nós, a Xente do Redor, que contribuíron coas súas intervencións a crear un ambiente de proximidade, emoción e convivencia.
Desde a dirección da revista, Avelino Jácome expresou a súa satisfacción pola extraordinaria resposta do público, destacando que «a verdadeira riqueza deste proxecto está nas persoas, na súa xenerosidade e na capacidade de construír unha gran parroquia dos afectos arredor da cultura».
A organización quere trasladar un agradecemento especial a Marcos Vila, a Óscar e a todo o persoal do Centro Comercial Ponte Vella, pola súa colaboración, hospitalidade e excelente disposición para facilitar a celebración deste encontro.
Do mesmo xeito, agradece a participación de todas as persoas que fixeron posible o acto, así como a presenza dun público que, unha vez máis, demostrou o seu compromiso coa cultura e coas iniciativas que fomentan a convivencia e a identidade colectiva. A revista Nós, a Xente do Redor continúa así o seu camiño como espazo de encontro entre a literatura, a arte, a memoria e as persoas, consolidando un proxecto cultural no que a amizade e os afectos ocupan un lugar esencial.
A presentación do número 23 deixou unha mensaxe especialmente significativa: as homenaxes máis fermosas son aquelas que se realizan en vida, cando aínda é posible compartir persoalmente o recoñecemento, a gratitude e o cariño. “Nós, a Xente do Redor. Unha gran parroquia dos afectos” dixo emocionado Avelino Jácome. Na foto, Xavier Casares terceiro pola esquerda.