AVE Lisboa-Porto-Vigo segue en pe para o 2032

O presidente da Xunta de Galicia, Alfonso Rueda ratificou en Lisboa a prioridade da alta conexión

Lisboa | O presidente da Xunta de Galicia, Alfonso Rueda, mantivo hoxe un encontro co ministro de Infraestruturas de Portugal, Miguel Pinto, no que puido ratificar co Goberno portugués a prioridade da conexión de alta velocidade Lisboa-Porto-Vigo para o país luso prevista inicialmente para o ano 2032.

“Estou moi tranquilo e moi satisfeito porque o goberno de Portugal confirmounos que mantén esta intención”, destacou Rueda. O presidente da Xunta manifestou a súa alegría por manter este encontro, que para el é unha demostración do gran momento de diálogo que mantén Galicia e Portugal.

Un diálogo cunha importancia moi grande, por todo o que une aos dous pobos, e lembrou todos os beneficios que ten para os dous territorios a conexión de Galicia coa rexión norte de Portugal, precisamente “despois de conseguir esta mesma semana o tren de alta velocidade que conecta as principais cidades galegas desde Madrid”, destacou. Ademais, aproveitou para pedirlle ao Goberno español que cumpra os seus compromisos coa destinación dos fondos europeos para poder compatibilizar os avances a ambos os dous lados da fronteira: “O que toca agora é dicir que todos os trámites deben acelerarse. Cada mes que pase é imprescindible”, sinalou.

Por último, Alfonso Rueda agradeceulle ao Ministro de Infraestruturas de Portugal o encontro, e valorou todo o que puideron tratar: “Falamos doutros temas de interese e quedou aberto unha canle de comunicación moi importante respecto a infraestruturas da Xunta que se desprazan ata a fronteira portuguesa”, finalizou o presidente.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.