Ponteareas | O Concello de Ponteareas pon en marcha unha nova iniciativa para ofrecer oportunidades reais de emprego a 100 veciños e veciñas que se atopan en situación de desemprego, co propósito de facilitar a súa incorporación ao mercado laboral e mellorar as súas perspectivas de futuro.
A través do Programa Integrado de Emprego 2026-2027, o goberno municipal quere ir máis alá da formación e da orientación profesional, establecendo como prioridade que as persoas participantes poidan acceder a un posto de traballo. O programa establece como obxectivo mínimo acadar unha inserción laboral do 45 %, o que supón conseguir a contratación de polo menos 45 das 100 persoas participantes.
O emprego como prioridade
A alcaldesa de Ponteareas, Nava Castro, destacou que o verdadeiro valor desta iniciativa reside nas oportunidades que pode abrir para as persoas que buscan un emprego. “O noso obxectivo non é simplemente organizar cursos ou desenvolver un programa de formación. O que queremos é que as persoas que hoxe están desempregadas teñan oportunidades reais de incorporarse ao mercado laboral. Queremos que este programa se traduza en contratos de traballo, en estabilidade e en novas oportunidades para as familias de Ponteareas”, sinala a alcaldesa.
A rexedora subliñou que o emprego é unha ferramenta fundamental para garantir a autonomía persoal, a igualdade de oportunidades e o desenvolvemento económico e social do municipio. “Detrás de cada persoa desempregada hai unha realidade persoal e familiar. Conseguir que unha persoa atope traballo significa moito máis que cumprir unha estatística: significa abrir unha porta ao futuro, recuperar oportunidades e mellorar a súa calidade de vida. Ese é o verdadeiro sentido deste programa”.
Nava Castro incidiu tamén na importancia de implicar ao tecido empresarial local para que a formación responda ás necesidades reais de contratación, destacando que “queremos escoitar ás empresas, coñecer os perfís profesionais que necesitan e preparar ás persoas participantes para cubrir esas oportunidades. A nosa prioridade é conectar a quen busca emprego con quen necesita contratar”.
Acompañamento personalizado
O programa desenvolverase durante doce meses, desde o 30 de outubro de 2026 ata o 29 de outubro de 2027, e contará cun equipo técnico especializado que acompañará individualmente ás persoas participantes durante o seu proceso de procura de emprego. As actuacións incluirán orientación laboral personalizada, formación adaptada ás necesidades do mercado, mellora das competencias profesionais, preparación de entrevistas de traballo e contacto directo coas empresas para identificar oportunidades de contratación.
A concelleira de Emprego, Silvia Fernández Táboas, explicou que o programa estará especialmente orientado a conseguir resultados concretos de inserción laboral. “Queremos que cada participante conte cun itinerario adaptado ás súas capacidades, experiencia e necesidades, pero tamén ás oportunidades de emprego existentes no noso contorno. O importante é que a formación e o acompañamento teñan unha finalidade clara: facilitar o acceso a un posto de traballo”, apuntou Fernández
Especial atención ás persoas con maiores dificultades
A iniciativa prestará especial atención aos colectivos que atopan máis obstáculos para acceder ao mercado laboral, entre eles as persoas desempregadas de longa duración, maiores de 52 anos, mozos e mozas menores de 30 anos, mulleres desempregadas, persoas con discapacidade e persoas en risco de exclusión social.
O Concello considera fundamental ofrecerlles ferramentas e acompañamento que permitan mellorar as súas posibilidades de contratación e evitar que as dificultades de acceso ao emprego se convertan nunha situación permanente.
287.500 euros para xerar oportunidades
O Programa Integrado de Emprego conta cun investimento total de 287.500 euros, dos que 230.000 euros proceden dunha subvención concedida pola Xunta de Galicia, a través da Consellería de Emprego, Comercio e Emigración, con fondos finalistas do SEPE.
Pola súa banda, o Concello achegará 57.500 euros de fondos propios, reafirmando así o seu compromiso coa creación de oportunidades laborais e coa inserción das persoas desempregadas. A selección das 100 persoas participantes realizarase en coordinación co Servizo Público de Emprego de Galicia (Emprego Galicia).
“O noso compromiso é claro: queremos un Ponteareas no que cada vez máis persoas teñan a oportunidade de traballar, desenvolver o seu talento e construír o seu futuro. Porque investir en emprego é investir nas persoas e no futuro do noso concello”, concluíu a alcaldesa.