XV Certame Galego de Bandas de Música en Celanova

Será no auditorio municipal Ilduara o 3 e 4 de decembro

Celanova | A Deputación de Ourense colabora coa celebración da XV edición do Certame Galego de Bandas de Música, que se celebrará o 3 e 4 de decembro no Auditorio Municipal Ilduara de Celanova. O certame, que por primeira vez celebrarase fora de Santiago, contará coa participación de oito bandas de música, ten entrada gratuíta e poderase ver tamén por streaming.

O deputado Pablo Pérez participou na presentación do certame acompañado polo alcalde de Celanova, Antonio Puga; o secretario xeral de Política Linguística, Valentín García; e o presidente da Federación Galega de Bandas de Música Populares -organizadora do evento-, Iván Estévez.

Pablo Pérez destacou que “é unha verdadeira honra para a Deputación apoiar este certame, que ten en Ourense e, concretamente, Celanova, o espazo ideal para a súa celebración”. O deputado remarcou a “enorme tradición que ten a cultura das bandas de música en Celanova”, con fitos como a propia escola municipal apoiada polo Concello e a Deputación. Valentín García manifestou a “enorme satisfacción por ver como este certame chega a Ourense, unha provincia cunha fonda tradición nas bandas de música, elementos dinamizadores que vertebran culturalmente o país”.

Pola súa banda, Antonio Puga agradeceu á Federación Galega de Bandas de Música Populares que escollera a vila celanovesa para celebrar este certame, destacando a tradición cultural de Celanova e a capacidade loxística e técnica para acoller este tipo de eventos.

Iván Estévez agradeceu na súa intervención o respaldo da Deputación, Concello e Xunta de Galicia, e sinalou a alta participación de bandas de música ourensás ademais da presenza da Banda de Lourenzá, nacida na pandemia.

Programación
O certame arrancará o sábado 3 de decembro no Auditorio Municipal Ilduara de Celanova coa participación das bandas de Caldas de Reis (17,00 horas), Santádega (18,00 horas), a Banda de Lourenzá (19,00 horas) e a Agrupación Musical da Limia (20,00 horas).

Para o domingo 4 de decembro, pola mañá será quenda para a sección infantil, coa participación a mediodía da Chikiband -de A Limia- e a Banda de música infantil de Rubiós (12,30 horas). Pola tarde, actuarán a banda xuvenil da Escola de Música de Silleda (17,00 horas) e a Banda Xuvenil de Celanova (18,00 horas).

A continuación celebrarase o acto de clausura, coa entrega de diplomas e premios, que pecharán un fin de semana no que tamén se dará conta do resultado do XV Concurso Galego de Composición, que conta con 44 propostas inscritas.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.

Outros artigos