VI Certame de Rondallas da Área de Vigo

Reuniu a 15 agrupacións de Vigo, Mos, O Porriño, Gondomar, Nigrán e Tui

Vigo | A vicepresidenta da Deputación de Pontevedra e responsable de Cultura, Marta Fernández-Tapias, asistiu no IFEVI á sexta edición do Certame de Rondallas da Área de Vigo, no que participaron 15 agrupacións de Vigo, Mos, O Porriño, Gondomar, Nigrán e Tui, que reuniron a preto de 1.200 rondalleiros nun espectáculo do que desfrutaron 7.000 persoas.

A vicepresidenta provincial felicitou á Federación de Rondallas da Área Metropolitana de Vigo “por continuar, ano tras ano, desenvolvendo este espectáculo único en Galicia”, ás agrupacións gañadoras e ao resto de participantes, pois “demostrades que a cultura tradicional está moi viva. Fixestes que sentísemos a paixón que todos tendes por esta tradición musical única, por esta aposta por difundir a cultura, cultivar e preservar as nosas tradicións”.

Os asistentes ao certame no IFEVI puideron desfrutar de más de tres horas de rondallas, que demostraron as súas habilidades sobre o escenario ao son de música tradicional, pero tamén con versións de pezas modernas, con acordes de Bon Jovi, Guns and Roses, Piratas do Caribe ou cancións dos anos 80. “É para min unha alegría ver como, xeración tras xeración, seguides cheos de vitalidade e contades cunha gran atención por parte do público”, asegurou a responsable provincial de Cultura, ao tempo que fixo fincapé en que “seguirá sendo así durante moito tempo. Non hai máis que ver, por exemplo, que a próxima película de Daniel Sánchez Arévalo levará por título ‘Rondallas’”.

Fernández-Tapias aproveitou ademais a ocasión para amosar o apoio da Deputación “a todo o que supoña dinamizar a cidade de Vigo e potenciar a súa cultura. Estamos convencidos da importancia de impulsala, sobre todo a tradicional, e traballamos intensamente para poñela no lugar que lle corresponde”.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.