Gondomar | Carlos Méixome, escritor e fundador do Instituto de Estudos Miñoráns (IEM), publica un novo libro, “Polo Avieiro de Dona Emilia” (Editorial Galaxia, 2026), no que ilustra a realidade de “Avieiro”, hidrotopónimo que funde Avia e Arenteiro dentro da creatividade da escritora Emilia Pardo Bazán, para imaxinar en clave de testemuña persoal o propio e difuso territorio do autor, co Carballiño no centro, e percorrelo da man da que denomina a “triloxía pardobazaniana do Avieiro” a través das súas obras: El cisne de Vilamorta; Los pazos de Ulloa; e La madre naturaleza.
Méixome ten publicado investigacións sobre a persecución franquista no sur da provincia de Pontevedra en obras como Catas na memoria. A persecución franquista no Val de Miñor (2021) e O terror nas Tebras e outras catas na memoria (2022).