O BNG reclama un trato equitativo para todas as asociacións veciñais de Mos

O Partido Popular levou ao último pleno unha moción da A.V. de Vilar, en Redondela, pero négase a atender as demandas dunha parte do tecido asociativo de Mos.

Mos/BNG | No pleno do mes de xullo no Concello de Mos, o Partido Popular presentou unha moción da Asociación de Veciños de Vilar na que se reclamaba a modificación do proxecto que ten a Deputación de Pontevedra para a reforma da Estrada EP-2906. O que pedían era retomar un proxecto anterior, redactado cando o PP gobernaba a Deputación, e o portavoz do BNG, Gustavo Barcia, amosou xa naquel momento a súa estrañeza ante esta iniciativa da equipa de goberno. Pediu explicacións e votou en contra da moción, ao entender que o lugar onde debería ser debatida era o Concello de Redondela, ao que pertence a parroquia de Vilar.

Gustavo Barcia afirma que para o goberno de Nidia Arévalo “hai mosenses de primeira e de segunda” e cre que o PP entende a política “de forma caciquil”.

A reacción do grupo municipal do BNG foi de sorpresa pero tamén de indignación, non polo contido da moción senón polo propio feito de presentala. En palabras de Gustavo Barcia, “a alcaldesa recibe na casa consistorial a unha asociación do concello veciño e leva as súas reivindicacións ao pleno, pero négase a atender as demandas dunha parte do tecido asociativo de Mos”. Denuncia que “algunhas asociacións do concello non son recibidas, non obteñen resposta aos seus escritos e mesmo son declaradas non gratas”, algo que o concelleiro nacionalista ve como “un claro síntoma de sectarismo”.

Equidade no trato
Gustavo Barcia lembra que a equidade no trato é unha obriga das institucións públicas na súa relación coa cidadanía. Afirma, ademais, que “para o BNG de Mos non existen mosenses de primeira e de segunda, senón que toda a veciñanza e todas as asociacións son igual de importantes e todas teñen dereito a ser recibidas”. Na súa opinión, “Nidia Arévalo e a súa equipa de goberno entenden a política de forma caciquil e por iso certos colectivos, mesmo de fóra do concello, teñen un trato privilexiado”.

Outros artigos

Os nosos anunciantes son importantes para nós.
Fainos o favor de desactivar o bloqueador de anuncios ou
engadir este sítio a túa lista branca.

Grazas!