Novos traballos de restauración no santuario de Nosa Señora das Ermidas en O Bolo (Ourense)

Cun investimento de case 560.000€

O Bolo | A Xunta de Galicia licitará nas vindeiras semanas novos traballos de restauración no Santuario de Nosa Señora das Ermidas cun investimento de case 560.000€. Así o anunciou o conselleiro de Cultura, Educación, FP e Universidades, Román Rodríguez, nunha visita ao lugar na que explicou que esta nova achega permitirá actuar na cuberta, fachadas e soportais, mellorar a zona das visitas culturais e a accesibilidade na Horta das Olivas e investigar a canalización histórica deste ben.

Con esta nova actuación o investimento feito polo Goberno galego neste santuario durante a última década elévase ata os case 850.000€. “Na Xunta de Galicia temos clara a relevancia deste monumento non só para a provincia de Ourense, se non para toda a Comunidade. Proba disto é o importante esforzo orzamentario que vimos facendo para garantir a súa conservación desde a súa declaración como Ben de Interese Cultural no ano 2006”, subliñou.

O Goberno galego é a administración máis comprometida co patrimonio cultural galego, como así o demostra o incremento nos orzamentos do vindeiro ano do 14% nas contas destinadas á conservación, restauración, investigación e divulgación de bens patrimoniais.
No caso concreto do Santuario de Nosa Señora das Ermidas, os traballos previstos inclúen a reparación da cuberta, a aplicación de tratamentos de limpeza, consolidación e renovación dos rexuntados e a restauración da bóveda plana da Torre do Evanxeo.

Ademais, na Casa da Administración están previstas tarefas de limpeza e a eliminación de cementos e elementos alleos e a desmontaxe das reixas e vidros existentes co fin de recuperar o espazo orixinal dos soportais.

O proxecto complétase coa dotación dunha nova iluminación, a renovación dos vidros, a recuperación das carpinterías, a execución de novas estruturas metálicas para soportar os Vía Crucis e a rehabilitación integral dos aseos, o que permitirá mellorar as infraestruturas da zona das visitas culturais.

Actuacións previas
O Santuario da Nosa Señora das Ermidas atópase situado entre os macizos das serras de Queixa, do Eixo e de San Mamede, nunha profunda garganta do río Bibei e próximo a unha das antigas rutas de penetración en Galicia, a Vía Romana de Astorga a Ourense, non lonxe do cruzamento coa Vía de Braga a Astorga. Goza dunha situación privilexiada, localizada nun anfiteatro natural que realza a súa arquitectura barroca.

Nos últimos anos a Xunta de Galicia xa executou varias actuacións de conservación neste inmoble a partir do plan director do Santuario das Ermidas desenvolto entre 2012 e 2014.

Para poder realizar todas estas melloras, a Consellería de Cultura, Educación, FP e Universidades asinou un convenio de colaboración coa Diocese de Astorga para a posta a disposición dos terreos e inmobles necesarios para a execución das actuacións de conservación e restauración en varios inmobles eclesiásticos, entre os que se atopa este santuario.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.

Outros artigos