• Segue conectado
  • |

Gómez Reino insiste en acadar un amplo acordo para a reconstrución de Galicia

"Temos que deixar á marxe calquera formulación electoralista ou partidista"

A Coruña / Galicia en Común |. O portavoz de Galicia en Común- Anova Mareas, Antón Gómez Reino, insistiu hoxe na necesidade de que as forzas políticas galegas alcancen un acordo para sentar as bases da reconstrución social e económica de Galicia deixando á marxe calquera formulación electoralista ou partidista.

“Temos que reconstruír este país desde o consenso e desde a defensa do público. A realidade demostrou que os que antes se consideraban elementos do debate ideolóxico, como a inutilidade dos recortes e as políticas de austeridade, a oportunidade das rendas de cidadanía e a importancia de reforzar a sanidade pública, son elementos de sentido común para toda a sociedade” .

Gómez Reino subliñou que Galicia en Común- Anova Mareas leva anos defendendo ese proxecto común, e lembrou que hai apenas uns días a coalición fixo unha proposta a todas as forzas políticas do país para reconstruír Galicia ao redor de cinco grandes eixos: o fortalecemento da sanidade e a protección social; o compromiso pola modernización do modelo de produtivo; o fortalecemento do sistema público de coidados; a mellora do sistema fiscal e da repartición de fondos, e a potenciación da posición de Galicia fronte ao Estado e ás institucións europeas.

“Non entendemos as présas de Feijóo. É unha irresponsabilidade que o presidente da Xunta meta agora na axenda pública a convocatoria de eleccións, porque Galicia aínda está nunha situación sanitaria e epidemiolóxica moi complicada. Este non é o momento de falar de eleccións senón de salvar vidas”.

O portavoz de Galicia en Cómun- Anova Mareas tamén lembrou que o Congreso dos Deputados acaba de constituír unha Comisión para a Reconstrución, da que forma parte e desde a que trasladará esas propostas.

Nese sentido, Gómez Reino lamentou que o presidente da Xunta, Alberto Núñez Feijóo, renunciase a exercer as súas competencias e que no canto de buscar o apoio das forzas políticas e da sociedade civil organizada para enfrontar a emerxencia sanitaria e a crise económica desde o acordo, a lealdade institucional e a crítica construtiva, prefira actuar en solitario e en beneficio dos seus intereses electorais.

Vídeo da rolda de prensa: https://youtu.be/0xd9ZQOBSxo

 

Publicado o 8 Mai 2020 en A Coruña, Política, Portada.
Síguenos na nosa canle en TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies