Toén | Alberte Montes, coñecido polo seu paso por Comedy Central, aparicións en series como ‘El Pueblo’, programas da TVG como Luar ou Land Rober e papeis cinematográficos protagonistas como o de “Padín” na serie ‘Fariña’, subirá ao escenario do Campo da Festa de Alongos este sábado 8 de agosto ás 20:30 h. co seu renovado espectáculo de humor “Galego pode selo calquera”.
Esta proposta escénica de Alberte Montes, baixo a produción de Hermanager Producións, volveu a diferentes escenarios galegos este verán (O Carballiño, Boiro, Ribadeo) grazas ao interese e patrocinio da Secretaría Xeral da Lingua para incluíla no programa de dinamización do galego, ‘FalaRedes’.
Galego pode selo calquera
Ser galego é doado? Depende. Os galegos temos un xeito de ser característico e diferenciado e historicamente téñense empregado tópicos derivados del para ridiculizarnos e mofarse de nós, feito que explicaría en parte que arrastrásemos algo de autoxenreira.
Ata non hai moito pensábase que a baixa autoestima dos galegos era crónica, pero Alberte Montes demostraranos con este monólogo, dende o humor, que non é así, que eses tempos foron pasando e agora xa somos quen de defendernos con orgullo do estigma combatendo os ignorantes, ríndonos dos propios defectos e chufándonos das nosas diferenzas. Ser galego non é só parar na escaleira e facerlle crer á xente que non sabemos se subimos ou baixamos. Para ser galego hai que reunir moitas máis aptitudes… entre elas, falar con orgullo a lingua de Rosalía.
Alberte é actor, cómico e guionista. Traballou en televisión, cine, teatro, radio e publicidade.
Como actor, na Televisión de Galicia, protagonizou as series de comedia DO DEREITO E DO REVÉS e AUGASQUENTES. Interveu ademais en MANO DE HIERRO, RAPA ou VIDA PERFECTA, entre outras. Formou parte do elenco de EL PUEBLO (Prime Video) e é un dos protagonistas de FARIÑA (Netflix).
En cinema, participou recentemente nas películas DOS DÍAS de Gonzaga Manso e CATORCE DE MARZO de Alberto Gross, que se estreará na vindeira Berlinale. Púidoselle ver tamén noutras como BIRD BOX BARCELONA dos irmáns Pastor, EL OLIVO de Icíar Bollaín ou REC 4 de Jaume Balagueró.
Como cómico participou de programas como LAND ROBER ou TOURILANDIA (TVG) ou BUENAS NOCHES Y BUENAFUENTE (Antena3) ou EN EL AIRE (La Sexta). Cara coñecida tamén de GOL TV, canle na que formou parte dos programas LOS LUNES AL GOL e LOS INFILTRADOS. Recentemente presentou o programa NO HAY PASIÓN PEQUEÑA.
Colabora en radio, actualmente na Radio Galega e RNE. Anteriormente na Cadena SER.
En teatro acumula dezaoito anos como profesional, percorrendo España en compañía e cos seus espectáculos de stand up comedy, chegando a preto das 1.000 actuacións en directo. Formou parte do elenco de humoristas da canle COMEDY CENTRAL, na que gravou dous especiais de comedia.