Feijóo visita as empresas afectadas polo incendio do polígono do Ceao en Lugo

Avanzou o apoio da Xunta para a súa recuperación

Lugo | O titular do Goberno galego, Alberto Núñez Feijóo, visitou as empresas afectadas polo incendio de onte no polígono industrial do Ceao para coñecer de primeira man os danos rexistrados e avanzou o apoio da Xunta para facilitar a recuperación da súa actividade.

Nese sentido, sinalou que aínda que agora deberán tomar parte as aseguradoras, a Xunta estará desde este instante á súa disposición, “tanto para asesorar en materia de seguros, como para garantir circulante e préstamos inmediatamente mentres non se executen as pólizas de seguros”.

Durante a visita, o presidente da Xunta tamén tivo verbas de agradecemento para todos os efectivos que participaron no dispositivo de extinción, polo seu labor e rápida actuación na que mesmo chegaron a arriscar as súas vidas. Tamén, para as administracións implicadas que traballaron con total coordinación “como un único equipo”.

“Os danos que deixa o incendio no polígono industrial de O Ceao sumarán moitos millóns e tardarase en cuantificar o impacto económico da catástrofe”

Os danos que deixa o incendio no polígono industrial de O Ceao sumarán moitos millóns e tardarase en cuantificar o impacto económico da catástrofe. Representantes das principais compañías aseguradoras das empresas afectadas estiveron este domingo no polígono e algúns xa aseguraron que o diñeiro chegará de forma inmediata para garantir que as empresas poidan seguir funcionando.

Os peritos empezaron o luns para traballar para avaliar os danos que causou o lume. O primeiro paso antes de fixar responsabilidades é esperar o informe dos bombeiros sobre o ocorrido. Haberá que esperar ás conclusións sobre os motivos do incendio. Serán os informes dos bombeiros os que deberán establecer onde e como se iniciou o lume. E despois haberá que avaliar tamén a resposta realizada ante o lume.

Algúns dos empresarios máis afectados, en tanto, dicían que teñen actualizadas as pólizas e confiaban en que chegue xa o diñeiro para recuperar a actividade.

Outros artigos