Estudantes do instituto Santiago Apóstol de Bos Aires visitan a Deputación da Coruña

Con motivo da súa viaxe de fin de estudos

Deputación da Coruña | O deputado Blas García, recibiu esta mañá na sede da Deputación a unha delegación de alumnos do instituto arxentino-galego Santiago Apóstol, da cidade de Bos Aires.

Os escolares, que cursan o último ano de Secundaria, realizan estes días a súa viaxe de fin de estudos. Durante os quince días de estancia, os mozos e mozas, entre 17 e 18 anos, terán a oportunidade de descubrir múltiples lugares da xeografía coruñesa e galega.

Blas García deu a benvida aos estudantes, aos que explicou o funcionamento da Deputación, e destacou a importante contribución do centro escolar á promoción da cultura e a lingua galega na capital arxentina, xa que os centos de alumnos de diversas nacionalidades que se forman no colexio teñen entre as súas materias escolares a lingua e a historia de Galicia e moitos deles teñen raíces familiares na nosa terra.

García, que tamén é alcalde de Ames, invitou aos escolares a visitar a localidade.
O instituto galego-arxentino Santiago Apóstol foi inaugurado en 1998 co obxectivo de desenvolver un programa educativo bicultural neste país. O alumnado do centro cursa nel materias coma lingua e literatura galegas e xeografía e historia de Galicia, contribuíndo así a manter a identidade e a cultura galega entre os estudantes.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.

Outros artigos