Difusión da figura do trovador Martín de Pedrozelos en Sarria

No marco do programa O teu Xacobeo

Sarria | A Xunta de Galicia contribúe á difusión da figura e da obra do trobador medieval Martín de Pedrozelos no marco do programa O teu Xacobeo, en colaboración coa Asociación de Periodistas e Estudosos do Camiño de Santiago (APECSA). O delegado da Xunta en Lugo, Javier Arias, participou en Sarria na presentación da exposición itinerante que promove este colectivo e financia o Goberno galego con 14.600 euros.

Trátase dunha mostra didáctica que recolle as dez cantigas, nove de amigo e unha de amor, desta importante figura da lírica medieval galegoportuguesa que, a dicir dalgúns investigadores, foi orixinario de Samos.

“Trátase dunha mostra didáctica que recolle as dez cantigas, nove de amigo e unha de amor, desta importante figura da lírica medieval galegoportuguesa”

A exposición comezará o seu percorrido en Sarria, entre o 7 e o 21 de maio, de onde pasará a Láncara; en xuño visitará Paradela e Triacastela; en xullo estará en Samos e O Incio; en agosto no Courel e Portomarín, e en setembro en Pedrafita do Cebreiro.

A iniciativa O teu Xacobeo, que depende da Vicepresidencia primeira e Consellería de Presidencia, Xustiza e Turismo, persegue que a celebración deste Ano Santo sexa máis participativa e chegue a todo o territorio. Arias sinalou que as dúas edicións do programa impulsan na provincia de Lugo 96 proxectos socioculturais que mobilizan máis de 2 millóns de euros.

No conxunto de Galicia, desenvolveranse máis de 400 propostas nas que a Xunta está a investir preto de 8 millóns de euros. “Estas achegas -asegurou Arias- permiten sumar centos de accións como esta exposición, que non só poñen en valor o contexto universal do Camiño, senón que amosan toda a riqueza da nosa terra, esa Galicia tan plural e tan rica que esconde, en todos os currunchos, verdadeiras xoias”.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.

Outros artigos

Os nosos anunciantes son importantes para nós.
Fainos o favor de desactivar o bloqueador de anuncios ou
engadir este sítio a túa lista branca.

Grazas!