Tui | Até o venres 28 deste mes de setembro está aberto o prazo de inscrición para cubrir as prazas vacantes no Club de Lectura da Biblioteca Municipal de Tui. Os requisitos son ter cumpridos os 18 anos, contar co carné de socio/a da Biblioteca Municipal de Tui ou da Rede de Bibliotecas de Galicia.
As persoas integrantes do Club de Lectura na temporada 2022/23 manteñen a súa praza. Aquelas que desexen incorporarse deben inscribirse persoalmente na propia biblioteca no edificio Francisco Sánchez ou enviando un correo electrónico a biblioteca@tui.gal, non podendo unha persoa usuaria inscribir a outra. Unha vez completadas as prazas vacantes por rigoroso orde de inscrición formarase unha lista de agarda.
O venres 29 de setembro comunicarase a todas as persoas inscritas a súa integración no Club de Lectura ou na lista de agarda para cubrir as vacantes que se produzan.
Un club de lectura é unha xuntanza periódica onde un grupo de persoas comentan diferentes libros, obras que previamente cada un deles leu de xeito individual.
A conversa varía dunha sesión a outra, pois xira arredor de aspectos moi variados: o estilo literario, a temática da obra, o pensamento do autor ou autora, amén das impresións persoais ou das emocións que o texto evoca nos lectores… todo ten cabida nas paroladas dos clubs.
Este encontro e posta en común resulta moi enriquecedor, pois favorece que os participantes amplíen os seus puntos de vista, perciban detalles que se lles pasaran por alto, ou enfoquen os textos dun xeito diferente. Na conversa todos se enriquecen de todos.
Participar é de balde, e a biblioteca proporciona os libros para cada sesión. As actividades desenvolveranse desde o mes de outubro de 2023 ata xuño de 2024 cunha sesión o segundo martes de cada mes. Lese un libro diferente de cada vez, procurando que as propostas lectoras sexan diversas e variadas.
Para a concelleira de Cultura, Sonsoles Vicente, este club de lectura é unha nova oferta de promoción da lectura e de participación que promove a Biblioteca Municipal tudense.
