A entidade ourensá Asicotur entra na Organización Mundial de Turismo

É a primeira asociación de Galicia en obter o devandito recoñecemento
O ourensán Alejandro Rubín Carballo, presidente de Asicotur, durante a asemblea xeral da OMT.

Ourense | A Asociación Internacional para a Cooperación Turística, Asicotur, foi designada como nova integrante da Organización Mundial de Turismo (OMT) en calidade de “membro afiliado”. A decisión adoptouse no marco da vixésimo cuarta reunión da asemblea xeral da organización.

Asicotur está presidida por Alejandro Rubín Carballo, exgerente de Expourense, e o obxectivo da mesma é fomentar a cooperación no ámbito turístico. Un campo con grandes posibilidades de desenvolvemento e “unha demanda que moitos detectamos nas nosas relacións profesionais”, segundo expresa Rubín Carballo na páxina web da entidade.

A asociación sostén que o status de Membro Afiliado da OMT só osténtano outras cincocentas empresas, institucións, destinos e oenegués do mundo e que se trata da primeira asociación de Galicia en obter o devandito recoñecemento.

O proxecto liderado por Alejandro Rubín ten como obxectivo “o ideal de cooperación e desenvolvemento en común de estratexias turísticas” e desde a súa nova condición reforzarase a conexión con outros grupos e o intercambio de coñecementos.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.

Outros artigos