Lugo | Lara Méndez, alcaldesa de Lugo, acompañada polo concelleiro de Deportes, Mauricio Repetto, e o portavoz municipal, Miguel Fernández, trasladoulles os parabéns en nome da afección e de toda a cidadanía ao equipo do CD Lugo, pola súa dedicación e esforzo, necesarios para poder manter a desexada permanencia en Segunda División.
A rexedora recibiu ao presidente da Tino Saqués, así como o adestrador, Rubén Albés, e a unha representación do primeiro cadro de xogadores no salón de plenos do Concello, e felicitoulles pola labor desenvolvida nesta tempada.
“Mantivéstesnos aos que vos seguimos co corazón nun puño, e fostes quen de dalo todo e superarvos, o que é motivo de orgullo para Lugo. Sabemos que hai clubes con maior capacidade económica e, polo tanto, cunha maior capacidade competitiva, polo que aínda é maior a fazaña conseguida non só nesta tempada senón tamén durante os nove anos consecutivos que levamos en Segunda”, declarou a alcaldesa.
“Lara Méndez puxo en valor a importancia da permanencia, ‘un motivo para aumentar a autoestima da cidade, da comunidade que defende as súas cores, as cores de Lugo”
Lara Méndez puxo en valor a importancia da permanencia, “un motivo para aumentar a autoestima da cidade, da comunidade que defende as súas cores, as cores de Lugo”. E destacou, ademais, o valor que ten que o CD Lugo “siga a ser un escaparate exterior do noso municipio, a enorme promoción que supón para nós, así como a relevancia económica que ten para a cidade, un tema que non é menor”.
A rexedora entregoulles aos representantes do club de fútbol, aos que desexou seguir cos seus éxitos na tempada que ven, un pin de plata da Muralla, así como un libro sobre o patrimonio bimilenario lucense. E o Clube agasallou a alcaldesa, unha camiseta co seu nome.
Pola súa parte, Tino Saqués, agradeceu o apoio da afección, da cidadanía, dos patrocinadores e das institucións ao club, e celebrou o enorme traballo realizado tanto polos xogadores como por todos os profesionais que os acompañan.
