A Coruña homenaxea a Marcial del Adalid cunha exposición filatélica con motivo do bicentenario do seu nacemento

Organizada pola Sociedade Filatélica da Coruña en colaboración co Concello

A Coruña | O concelleiro de Cultura e Turismo, Gonzalo Castro, participou esta tarde na inauguración da exposición filatélica conmemorativa do bicentenario do nacemento de Marcial del Adalid, organizada pola Sociedade Filatélica da Coruña en colaboración co Concello. A mostra, situada na Casa da Cultura Salvador de Madariaga, rende homenaxe a unha das figuras máis relevantes da música galega do século XIX, coincidindo cos 200 anos do seu nacemento na cidade.

Durante o acto, Castro agradeceu o traballo da Sociedade Filatélica da Coruña e das persoas que colaboraron cedendo as súas coleccións, destacando a importancia deste tipo de iniciativas para achegar o patrimonio cultural coruñés á cidadanía. “Conmemorar os 200 anos do seu nacemento non é simplemente volver a vista atrás”, sinalou o concelleiro, quen incidiu na necesidade de preservar e divulgar o legado musical da cidade entre as novas xeracións. A exposición reúne na planta baixa once coleccións filatélicas de ámbito estatal dedicadas á temática musical, mentres que na segunda planta se poden contemplar diferentes coleccións achegadas polos socios da Sociedade Filatélica da Coruña. A iniciativa propón así un percorrido pola relación entre a música e a filatelia, empregando os selos e o coleccionismo como ferramentas para divulgar a historia e preservar a memoria cultural.

Ademais, Correos sumouse á conmemoración coa emisión dun selo personalizado e dun cuño conmemorativo dedicados a esta efeméride, contribuíndo á difusión da figura do compositor coruñés. Un ano de homenaxes ao legado musical de Marcial del Adalid Esta exposición súmase ás diferentes actividades culturais desenvolvidas na cidade ao longo de 2026 para conmemorar o bicentenario do nacemento de Marcial del Adalid (1826-1881), compositor que destacou pola súa capacidade para integrar as correntes do romanticismo musical europeo coa tradición e as raíces culturais galegas. Entre estas iniciativas figura a homenaxe coral promovida polo Instituto José Cornide de Estudos Coruñeses o pasado 11 de abril na igrexa de San Xurxo, coa interpretación de motetes do compositor a cargo do Orfeón Terra A Nosa. Posteriormente, o 19 de maio, a Real Academia Galega de Belas Artes acolleu a presentación dunha edición recuperada destas partituras, nun acto que incluíu unha nova interpretación dunha selección destas composicións por parte de solistas do mesmo orfeón.

Tamén os días 9 e 10 de setembro, o Teatro Colón foi escenario dos concertos A memoria cantada, organizados pola Real Academia Galega de Belas Artes co apoio do Concello, nos que participaron oito formacións corais distinguidas coa Medalla Marcial del Adalid, entre elas El Eco e Cántigas da Terra. A programación conmemorativa incluíu, ademais, diferentes conferencias e recitais no ciclo Martes das Artes da Real Academia Galega de Belas Artes, dedicados a afondar na obra e na traxectoria do músico. Entre as propostas figuraron interpretacións de composicións para piano, música de cámara e repertorio vocal, así como dos Cantares viejos y nuevos de Galicia, que permiten achegarse á relación entre a creación musical de Adalid e a tradición cultural galega.

Marcial del Adalid, nacido na Coruña en 1826, foi unha figura destacada do romanticismo musical e un dos compositores galegos máis relevantes do século XIX. A súa obra abrangue composicións para piano, música de cámara, canción e creación escénica, e constitúe un legado fundamental para comprender a evolución da música galega e a súa relación coas correntes artísticas europeas do seu tempo.

Deixa unha resposta

Este sitio usa Akismet para reducir o spam. Aprende como se procesan os datos dos teus comentarios.