• Segue conectado
  • |

O Xulgado abre a porta á recuperación do adro da Igrexa de Guillade

A sala do contencioso-administrativo rexeita un recurso do crego e avala a decisión do Goberno local de revogar a legalización concedida polo anterior goberno.

O Goberno local amosou a súa satisfacción ante a resolución xudicial “porque a nosa posición é moi clara: queremos que se recupere o adro orixinal da Igrexa de Guillade”.

 

Ponteareas | O Xulgado do contencioso-administrativo nº3 de Pontevedra desestimou o recurso interposto polo crego de Guillade contra a decisión do actual Goberno local de revogar a licenza de legalización do adro da igrexa outorgada polo anterior goberno presidido por González Solla.

Segundo fontes municipais, esta decisión xudicial abre as portas á recuperación do adro orixinal da igrexa. “O crego terá que presentar en 15 días un proxecto que xustifique a necesidade, viabilidade e ausencia de impacto das obras realizadas. Dito proxecto terá que ser informado polos servizos urbanísticos do Concello e ser remitido á Dirección Xeral de Patrimonio que terá que informalo. Tendo en conta que todos os informes técnicos da Xunta e do propio Bispado emitidos nos últimos dez anos indicaron que as obras eran inviables, estamos convencidos de que a legalización non será autorizada, o que obrigará definitivamente a recuperar o adro orixinal”.

As obras do adro da igrexa de Guillade foron executadas entre 2003 e 2005 e consistiron no levantamento dun conxunto funerario do século XVIII e substitución por un novo pavimento. As obras foron sancionadas polo Concello e pola Xunta de Galicia quen ordenaron en 2007 ao crego repoñer o adro ao seu estado orixinal.

En 2012 o ex tenente alcalde do Concello, Roberto Mera, solicitou no Concello o cumprimento da orde. Poucos meses despois, o crego obtiña o informe favorable da Dirección Xeral de Patrimonio para legalizar unhas obras que a propia Xunta rexeitara e sancionara nos anos anteriores.
Finalmente, o executivo local presidida por González Solla decidiu outorgar a licenza de legalización das obras en abril de 2015, un mes antes das eleccións municipais.
O acordo de Goberno foi recorrido por Roberto Mera e o novo goberno local estimou o recurso parcialmente en setembro de 2015, revogando a licenza concedida ao crego e requiríndoo para que presentase proxecto técnico e xustificativo das obras a legalizar.

Esa decisión foi recorrida polo crego de Guillade nos tribunais que, agora, ano e medio despois, desestiman o seu recurso impoñéndolle os custes polos gastos ocasionados ao concello e a Roberto Mera, por ser tamén parte no preito.

O recurso do crego baseouse en negar a consideración do adro como elemento protexido. A sentenza é clara e contundente ao respecto sinalando que o conxunto funerario é sen dúbida un ben protexido pola Lei de Patrimonio de Galicia, o que leva a esixir o proxecto previsto en dita lei. O tribunal considera que a licenza outorgada por Solla sen dito proxecto é “un defecto formal procedimental de moito calado”, polo que avala a decisión do actual Goberno de esixir o proxecto.

Publicado o 20 Mar 2017 en Ponteareas.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies