Aldea Global | O director de Turismo de Galicia, Xosé Merelles, mantivo hoxe cadansúa xuntanza nada máis chegar a Nova York co director da Oficina Española de Turismo (OET), Magí Castelltort, e coa directiva da asociación de axentes de viaxes de Estados Unidos, Alta Travel USA.
Xosé Merelles salientou a necesidade de asentar distintas accións de colaboración institucional para contribuír a incrementar o fluxo de turistas estadounidenses cara Galicia tendo en conta que “Estados Unidos é o primeiro mercado internacional en termos de gasto total en Galicia e tamén no que atinxe a gasto medio diario”. O gasto total do turismo de Estados Unidos en Galicia superou os 200M€ nos primeiros nove meses do ano e o gasto medio deste turista situouse en 282€, moi superior á da media do visitante internacional nos primeiros oito meses deste ano cifrado en 147€.
Xosé Merelles destacou a importante noticia para favorecer o incremento do número de turistas estadounidenses do anuncio de United Airlines dun novo voo directo entre Newark e Santiago de Compostela a partir de maio de 2026. “Esta decisión reforza a posición de Galicia como destino internacional e consolida o traballo da Xunta na promoción do destino en orixe, á que este ano se destinaron 13M€, como estratexia para favorecer a chegada de turistas estranxeiros”, subliñou.
Engadiu tamén que esta é a liña na que se quere seguir traballando desde o Goberno galego, “concienciando e apostando por seguir atraendo cada vez máis a turistas estadounidenses”, para o que demandou a cooperación interinstitucional, establecendo ademais vínculos directos cos operadores turísticos locais para que deseñen paquetes turísticos para ofrecer a este mercado.
Crecemento do 25 por cento
Xosé Merelles subliñou que o turismo estadounidense en Galicia está a medrar nos últimos anos a un ritmo do 25% en canto ao número de viaxeiros atraídos sobre todo polos recursos paisaxísticos, patrimoniais, gastronómicos, culturais e, sobre todo, polo Camiño de Santiago.
O director de Turismo de Galicia salientou que de xaneiro a setembro deste ano xa visitaron Galicia 207.158 estadounidenses que se aloxaron en establecementos hoteleiros galegos, facendo máis de 302.000 noites e representando o 13,2% de todo o turismo internacional.
En canto ao Camiño de Santiago, máis de 43.000 estadounidenses xa recolleron a Compostela este 2025 tras realizar sobre todo os Camiños Francés e o Portugués. O período de abril a xuño é o de maior afluencia de peregrinos de Estados Unidos, país que ocupa o primeiro lugar no ranking de países de orixe internacional.
Presentación da España Verde
Merelles tamén presentou a marca España Verde ante unha selección de operadores turísticos do país. A iniciativa España Verde está deseñada de forma conxunta polas comunidades de Galicia, o Principado de Asturias, Cantabria e Euskadi. Márcase o obxectivo de enriquecer a oferta de produtos turísticos do destino cunha proposta orixinal e sostible, que pon en valor as características comúns a nivel de turismo e diferencian a rexión doutras de España. Entre outras, valóranse as similitudes no patrimonio natural e arquitectónico, o estilo de vida, o clima ou a gastronomía.
Baixo o seu paraugas, o director de Turismo de Galicia, explicou proxectos como a Reserva Ecoturista da España Verde. “Esta é unha gran ruta de ecotouring que percorre 25 espazos naturais protexidos, dos que seis se localizan en Galicia”, afirmou.
O programa da visita do director de Turismo de Galicia a Nova York continuará este xoves coa sinatura dun acordo coa Hispanic Society of America en materia de turismo cultural, e tamén con reunións coa compañía Tauck Travel, un dos principais operadores estadounidenses especializados en itinerarios polas rutas xacobeas, para a promoción do turismo termal e do Camiño de Santiago.