• Segue conectado
  • |

Vigo acollerá a manifestación nacional do Día das Mulleres o vindeiro domingo 4 de marzo

O lema será ‘Para transformar a vida das mulleres: folga de coidados, folga laboral e folga de consumo’, en apoio á convocatoria do propio día 8 de marzo

Vigo | Mulleres, colectivos e plataformas de toda Galicia, organizadas na Asemblea Galegas 8M, convocan este ano a Manifestación Nacional Galega do Día das Mulleres​, que terá lugar en Vigo ​o domingo 4 de marzo.

​O percorrido arrancará ás 12:00 dende a Vía Norte (esquina con Urzaiz) e rematará coa lectura do manifesto na Praza do Berbés.

Neste lugar está previsto un xantar e as seguintes actuacións: un ​recital poético a cargo de Lupita Hard, Nuria Vil, Elvira Riveiro, Silvia Penas e Marta da Costa, co acompañamento de DJ Señora, e a continuación as actuacións musicais de Su Garrido, As Punkiereteiras e As Ghatas Salvaxes. Tamén haberá un espazo para as crianzas.

Por primeira vez, a mobilización descentralízase e sae da capital galega, coa intención de artellar e fortalecer redes ​entre as mulleres do país e apoiar e amosar a forza do movemento feminista noutros lugares. O obxectivo a longo prazo é espallar aínda máis esta convocatoria e darlle nos vindeiros anos un carácter rotativo, achegándonos así a outros puntos do país.

Transporte a Vigo

A organización da manifestación está traballando para poñer a disposición de todas as persoas que queiran achegarse a Vigo o 4 de marzo varios autobuses en cada provincia​, de ida e volta, que serán gratuítos ou a un prezo simbólico​.

O obxectivo é facilitar que o maior número posible de persoas poida vir sen ter que poñer os seus propios recursos, minimizando tamén a nosa pegada ambiental. Polo de agora, hai previstas máis de 10 rutas con paradas intermedias. A reserva de prazas está aberta ata o martes 27 de febreiro e realízase a través do formulario de transporte que se atopa no noso blog oficial: https://galegas8m.wordpress.com/transporte-a-vigo/.

Folga de Mulleres

A elección do 4 de marzo, fin de semana previa ao propio día 8, responde á nosa implicación no Paro Internacional de Mulleres, impulsado por feministas de todo o mundo e secundado en Galicia co respaldo das organizacións sindicais. Queremos que a manifestación nacional de Vigo sirva para darlle aínda máis apoio a esta gran aposta que é a Folga de Mulleres.

A Folga de Mulleres non será só a nivel laboral​, se non tamén de coidados e de consumo, pretendendo visibilizar a importancia dos traballos non remunerados que recaen normalmente nas mulleres (coidado de crianzas, xestión das compras no fogar, coidado das persoas maiores….). Queremos romper a fenda salarial no eido laboral e reivindicar que os coidados deixen de estar feminizados​, que se poñan no punto de mira e se equilibren. Entendemos que deberían ser responsabilidade de toda a sociedade, ​tanto dos nosos compañeiros homes como das institucións.

Publicado o 21 Feb 2018 en Axenda, Portada, Vigo.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies