• Segue conectado
  • |

Ponteareas traballa xa nas modificacións do PXOM esixidas pola Xunta

Tanto o arquitecto director do PXOM como a arquitecta municipal consideran “que as bases do planeamento son válidas e non foron postas en cuestión pola Orde da Consellería”.

Ponteareas | Todas as forzas políticas da Corporación Municipal de Ponteareas participaron, no día de onte e convocadas polo Goberno local, na primeira das reunións logo de coñecerse a Orde da Xunta de Galicia na que se marcan os cambios a realizar no Plan Xeral de Ordenación Municipal de Ponteareas, para que se poida levar a cabo a súa aprobación definitiva.

 

Ao longo desta primeira xuntanza de traballo, tanto o arquitecto director do PXOM, como a arquitecta municipal, fixeron constar o seu convencemento de que as bases do planeamento “son válidas” e que non foron postas en cuestión pola Orde da Consellería de Medio Ambiente e Urbanismo. Nese sentido, recoñecendo que “hai un traballo minucioso que desenvolver”, os técnicos foron claros ao afirmar que o Plan “é viable, máis alá dos cambios que a Xunta indica que se deben realizar nas novas zonas de expansión urbana”.

O máis urxente, apuntan, é establecer un procedemento entre os técnicos do PXOM e o departamento de urbanismo da Xunta de Galicia para contrastar “punto por punto todos os cambios a realizar no documento”.

Dada a meticulosidade coa que se van a afrontar os traballos de corrección, o Goberno local non se aventura a marcar prazos concretos pero, aclaran, que todo o que non está reflectido na Orde da Consellería “que é unha amplísima maioría da documentación do PXOM, enténdese como ‘tacitamente aprobado”.

Na reunión de onte, tanto os redactores do PXOM, como a arquitecta municipal coincidiron en que os cambios no rural “non son relevantes” e chamaron a atención sobre o feito de que as cuestións relativas a Patrimonio, que na meirande parte dos Plans atrasan a súa aprobación, “e que foron solucionadas no último ano, non foron obxecto de ningún reparo por parte da Xunta”.

O Goberno local salientou, logo da reunión, que unha das cuestións máis importantes a aclarar coa Consellería de Medio Ambiente e Urbanismo, coa que se solicitou xa unha xuntanza coa súa titular, Beatriz Mato, é a situación dos chans industriais, como pode ser o caso da Lomba, “e que teñen unha importancia fundamental para o desenvolvemento do municipio”.

O equipo técnico do PXOM, que xa traballa nas correccións e axustes a realizar, “dará prioridade a aqueles temas que teñen relación con outras administracións”. Ese foi, precisamente, o motivo polo que non se aventuran a dar prazos concretos xa que “se necesitan informes dalgunha administración pública e, o importante agora, é deixar ben pechado o documento para que sexa definitivo”, aseguraron.
Ao remate das máis de dúas horas de reunión, tanto o equipo técnico como o grupo de Goberno e os demais grupos da oposición municipal, agardan que “este sexa o último atranco para que Ponteareas poida contar, xa de xeito definitivo, con un Plan Xeral de Ordenación Municipal”.

Tanto a concelleira de Urbanismo, María Jesús Garrote, como o alcalde Xosé Represas, explicaron que todos os cambios que se realicen “seguindo escrupulosamente as indicacións da Xunta”, serán levados novamente a aprobación plenaria da Corporación e posteriormente remitidos novamente á Consellería de Medio Ambiente e Urbanismo para a súa aprobación definitiva.

Asemade, alcalde e concelleira, manifestaron o seu compromiso firme “de informar á cidadanía sobre o documento final”, logo das modificacións requiridas pola Xunta “e antes de aprobar no Pleno ditas modificacións”.

Publicado o 20 Feb 2017 en Ponteareas.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies