• Segue conectado
  • |

Os conflitos dos galegos en Londres toman o bus urbano de Compostela para presentar “Get Back”

Santiago de Compostela | Federico Pérez, Miguel Guido e Mercedes Castro interpretaron na Liña 1 un anaquiño de Get Back, a comedia escrita por Diego Ameixeiras e dirixida por Jorge Coira que representarán, xunto con Alfonso Agra e Tamara Canosa, este xoves, venres e sábado no Teatro Principal.

 

Os conflitos dos galegos en Londres interromperon hoxe a cotiá tranquilidade da liña 1 do bus urbano de Santiago de Compostela. Os coñecidos actores galegos Federico Pérez e Mercedes Castro e máis o intérprete inglés Miguel Guido sorprenderon ao usuarios do transporte público cun anaquiño da comedia teatral Get Back que chega esta semana ao Teatro Principal. Xunto a eles os tres, completan o elenco de londoners -galegos emigrados en Londres- Alfonso Agra e Tamara Canosa. Os cinco dan vida a esta obra escrita por Diego Ameixeiras a partir dunha idea orixinal de Camilo Franco e dirixida por Jorge Coira. Unha comedia cun punto de drama que quere dar unha visión alonxada dos tópicos dos galegos melancólicos e contar algunhas das historias que esconde a emigración. A cita será os días 19, 20 e 21 de xaneiro e as entradas están xa á venda por 10 euros a través das canles habituais de Abanca.

“Buscar a vida polo mundo adiante”, aclara Federico Pérez, “é unha característica case esencial dos galegos”. E o autor do texto, Diego Ameixeiras, engade: “a emigración é distinta nos distintos momentos da Historia, pero as problemáticas son as mesmas. Hai un pequeno drama detrás de cada persoa que se ve obrigada a saír do país, un fracaso persoal e colectivo ao que nós lle quixemos sacar un punto divertido”. “Cada personaxe de Get Back ten a súa circunstancia, a súa soidade”, explica Mercedes Castro, “e a conexión co resto fainos reflexionar sobre a nosa vida e sobre cara a onde dirixila”. Miguel Guido, inglés emigrado a Galicia e fillo de emigrantes galegos emigrados ao Reino Unido, achega a perspectiva do país de acollida.

“Get Back chega a Santiago despois de recoller os aplausos do público en media ducia de localidades galegas”, recordou a concelleira María Rozas na presentación ante a prensa, “porque representa o gran talento que temos no país, tanto detrás do escenario como enriba del. Como vimos no aperitivo que nos ofreceron no bus urbano, trátase dunha obra que leva a reflexionar sobre temas de actualiade, personaxes cercanas que tratan temas cotiáns dende un punto de vista divertido”.

Sinopse
Son cinco e van nun vagón de metro. Son cinco e teñen moitas cousas en común. Pero eles non o saben. Aínda. Saben que van no mesmo vagón de metro. Saben de onde veñen, pero ningún está moi seguro de cara a onde vai. Son xente normal e están en Londres. Se son normais e están en Londres é que probablemente sexan emigrantes. Están no metro e como non poden mirar para as paredes, miran para o móbil que vai cuspindo algunhas novidades do lugar do que proceden. Que vas facer esta semana? Xa reservaches o voo para Nadal? Sabes que detiveron a aquel rapaz que estudara contigo en Santiago? O fillo do carniceiro non quere seguir co negocio. Cousas normais, de xente normal que se deixa mover polo meneo normal do metro. Pero o metro detense. Para en ningures porque queda atoado no medio do túnel e pode ser unha avaría, un atentado, unha folga ou todas as cousas á vez. E quedan os cinco Get Back mirando para o móbil e logo mirando para eles sucesivamente. O metro para e comezan os problemas. Porque son cinco, porque teñen moitas cousas en común pero non o saben, porque están lonxe de onde son e porque cada un deles ten urxencias particulares. Están perdidos nun subterráneo de Londres e quizais teña que vir rescatalos o exército. Pero primeiro van ter que entenderse. A comedia comeza como un accidente. Eles non o saben cando entran a ese vagón con traxecto interrompido, pero son catro galegos buscándose a vida en Londres e un inglés que, en algún tempo, se buscou a vida en Galicia. As vidas quedan cruzadas xusto cando se detén o movemento e a partir de aí case todo é retranca.

Publicado o 18 Xan 2017 en Santiago de Compostela.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies